10 ex-NPA, immawat tulong manipud gobierno

SIUDAD TI VIGAN – Immawat ti tulong dagiti 10 a dati a kameng ti New People’s Army (NPA), a simmuko itay nabiit kadagiti kameng ti Philippine Army iti Ilocos Sur, manipud iti Comprehensive Local Integration Program (CLIP) ni Presidente Rodrigo R Duterte idi Mierkules (Pebrero 10, 2017).
Agdagup ti P807,000 ti inyawat da Gobernador Ryan Luis V. Singson iti Ilocos Sur, ken ni Heneral Angelito M. de Leon, kumander ti 7th Infantry “Kaugnay” Division ti Philippine Army, babaen ti maysa a simple a seremonia iti kapitolio, kuna ni Teniente Koronel Eugenio Julio C Osias IV, kumander ti 81st Infantry Battalion a nakabase iti Santa Cruz, Ilocos Sur.
Inparipirip ni de Leon a ti CLIP ket programa ti gobierno para kadagiti simmuko a rebelde nga NPA ken dagiti aktibo a sumupsuporta ti Milisyang Bayan a mayat nga mangabaruanan ti biag.
“Rebbengen dagiti opisiales ti gobierno ti mangisigurado ti nasayaat a panakaited ti programa ti gobierno kadagiti maseknan nga umili,” kuna ni de Leon.
Daytoy ti maysa a konkreto a pammaneknek ti nagkaykaysa a panagtitinnulong dagiti amin nga opisiales ken ahensia ti gobierno a maseknan iti pannakaited ti programa’t gobierno kadagiti umili tapno magun-od ti naan-anay a panagdur-as ken kappia iti pagilian.
Kinunana pay a ti pannakaited ti tulong pinansial kadagiti 10 a dati a rebelde ket mangipakita ti kinapudno ti gobierno a mangisardeng ti gubat ti nagbaetan ti gobierno ken ti National Democratic Front-Communist Party of the Philippines-New People’s Army (NDF- CPP-NPA).
“Iti laksid dagiti adu a karit, kasapulan nga ituloytayo ti panagtitinulong a mangted ti agnanayon a kappia, ken pudno a panagrang-ay iti lugartayo, babaen ti pannakaited kadagiti programa ken serbisio’t gobierno kadagiti umili,” kuna ni de Leon.
“Dagiti NPA ket biktima ti saan a husto nga ideolohia, isu a kasapulan a silulukat a kanayon dagiti programa ti gobierno para kadakuada tapno magun-od ti husto a linak, talna ken panagdur-as iti pagilian,” kuna met ni Osias.
“Datayo a mangsalsalluad ti kappia ken panagdur-as iti pagilian ket masapul nga ipaaytayo ti napudno a pannakaited dagiti programa ken serbisio ti gobierno para kadagiti umili pakairamanan dagiti rebelde nga NPA,” kuna met ni Coronel Milfredo M. Melegrito, hepe ti 702nd Infantry Brigade ti Philippine Army. ICR/PIA-Ilocos Sur / ABN

Amianan Balita Ngayon