16 bayan, isinailalim sa leptospirosis watch

July 16, 2017 Provincial

LINGAYEN, PANGASINAN – Nagbabala ang Provincial Health Office (PHO) sa mga residente ng Pangasinan na iwasan ang lumakad sa matubig ngayong tag-ulan dahil 16 na bayan ang nailagay sa leptospirosis watchlist.
Sa pahayag ni Dr. Anna de Guzman, provincial health officer, anim na katao ang namatay at 40 ang tinamaan ng leptospirosis mula sa iba’t ibang bahagi ng Pangasinan mula Enero 2017.
Ang mga bayan na nasa ilalim ng watchlist ay Mangatarem, San Jacinto, Mangaldan, Burgos, Bayambang, Sta. Barbara, Sual, Tayug, Alaminos City, Binmaley, Bolinao, Mabini, San Carlos City, Manaoag, San Fabian at Alcala.
Ang Dagupan City, na nakahiwalay bilang isang political unit ng Pangasinan, ay nakapagtatala rin ng mataas na insidente ng leptospirosis bawat taon.
Ayon sa PHO, ang leptospirosis ay isang sakit sanhi ng bacteria leptospira na pumapasok sa katawan ng tao mula sa open wound sa paa o sa ibabang bahagi ng katawan.
Ang pinakabagong fatality ng leptospirosis ay isang babae mula sa Barangay Bari, Mangaldan.
Ayon pa sa PHO na ang mabuting paraan upang maiwasan ang sakit ay ang hindi paglakad sa matubig na bahagi at kung hindi maiiwasan ay kinakailangang magsuot ng protective boots.
Pinaalalahanan naman ni De Guzman ang mga residente ng Pangasinan na kung naramdaman ang unang sintomas ng sakit, kinakailangang magpasuri agad ang pasyente sa doktor at huwag hintaying lumala pa ang kondisyon.
Mula sa website ng Department of Health, ang mga palatandaan ng leptospirosis ay lagnat; panginginig ng katawan o “chills”; pananakit ng ulo, binti, kalamnan at kasu-kasuan; pamumula ng mga mata; paninilaw ng balat; at nahihirapang umihi. Kung may lagnat nang dalawang araw ay agad na komunsulta sa doktor. May ulat si LVMICUA/PNA / ABN