189 pambansang ahensiya ng gobyerno, sumusunod na sa FOI

March 10, 2018 Metro BLISTT

Ang lahat ng 189 pambansang ahensiya ng gobyerno (NGAs) ay lubos nang sumusunod sa Freedom of Information (FOI) Law umpisa noong Marso 6, 2018 na magbibigay sa mga Pilipino nang mas madaling oras sa pagkuha ng pampublikong datos mula sa mga opisinang ito.
Ito ang ipinahayag ni Presidential Communications Assistant Secretary for Policy and Special Concerns Kristian Ablan sa mga miyembro ng Media sa Baguio noong Martes.
Sinabi ni Ablan na siya ring director ng Freedom of Information (FOI) program ng gobyerno na lahat ng NGAs ay nagsumite ng kani-kanilang FOI manuals.
Ayon pa kay Ablan, ang isa’t-kalahating taon ng implementasyon ng FOI program ay tumutok ang gobyerno sa NGAs kaya 100 porsiyento ang compliance rate.
Sinabi niya na ang pagtutok ay ililipat na sa mga opisina ng gobyerno sa ilalim ng executive branch na kailangan pang sumunod sa pagsumite ng kanilang FOI manuals.
Binanggit ni Ablan na 83 sa kabuuang 120 government-owned and controlled corporations o 68 porsiyento ay FOI-compliant.
99 sa kabuuang 113 state universities at colleges ay compliant na o 88 prosiyento, habang 175 sa 500 local water districts sa buong bansa o 35 porsiyento ay nakasunod na sa FOI law.
“FOI tries to rebuild the foundation of trust between citizens and government,” ani Ablan. “If government allows itself to be open and vulnerable, then the citizens will be more trusting.”
Pinirmahan ni Pangulong Rodrigo Duterte ang FOI Executive Order noong Hulyo 23, 2016 na layong panatilihin ang karapatang konstitusyunal ng mga Pilipino sa impormasyon sa mga bagay na pampubliko.
Ang FOI ay mahalagang elemento ng plano sa pamamahala ng administrasyong Duterte na magkaroon ng mga reporma at inisyatibo na makamit ang mas higit na transparency, accountability at partisipasyon ng mamamayan sa pamamahala.
Sa pamamagitan nito ay mabigyang-kapangyarihan ang mga mamamayan na gumawa ng formal request na kumuha ng pampublikong impormasyon, maliban sa mga sensitibong lugar na nakakaapekto sa pambansang seguridad.
Sa pagkuha ng serbisyo ng FOI ay kahit sino lalo na ang mga nagmumula sa probinsiya ay makakaiwas sa abala ng biyahe sa Metro Manila sa simpleng pag-oonline lamang. Kailangan lang maglog-on sa opisyal na website ng FOI. Oras na makalog-on ay maaaring sumagot sa online ang humihingi ng impormasyon at banggitin ang buong pangalan, contact information, at ang gustong uri ng komunikasyon.
Ang FOI ay ipinagpalagay ng gobyerno bilang isang paraan upang hadlangan ang tinatawag na “fake news”. ABN