2 patay, 1 sugatan sa lasing na pulis sa La Union

Headlines

SAN FERNANDO CITY, LA UNION – Humantong sa pagkakapaslang ng dalawang lalaki habang ikinasugat naman ng isa pa ang pagkapikon ng isang pulis sa mga kainuman nito sa Barangay Santiago Sur, lungsod na ito, Mayo 17, 2017.

Kinilala ni Police Superintendent Dennis R. Rodriguez, hepe ng pulis, ang suspek na si PO1 Ricardo A. Rillo, 44, residente ng naturang lugar, at nakatalaga sa Santiago Police Community Precinct.

Agad na namatay sina Willie D. Fernando, 48, at Joseph Balanag matapos silang pinagbabaril ng suspek habang ang nasugatang biktima na si Christian Fernando, 23, pamangkin ni Willie, ay dinala sa Ilocos Training Regional Medical Center. Ang mga biktima ay pawang residente rin sa lugar.

Ayon kay Rodriguez, sa pahayag ng isa nilang kainuman na kinilala sa pangalang Pedro Apiado, nagkaroon ng pagtatalo sa pagitan ng dalawang namatay na biktima at suspek. Sinubukang umawat ni Christian ngunit maging ito ay pinaputukan.

Hindi malinaw kung ano ang biro na naging dahilan ng galit ng suspek.

Ayon pa kay Apiado, nauna silang umuwi ni Rillo habang ipinagpatuloy pa ng mga biktima ang inuman.

Dakong 8:45pm ay bumalik ang suspek at walang atubiling pinagbabaril ang mga biktima.

Narekober ng rumespondeng Scene of the Crime Operatives ang 10 piraso ng basyo ng cal.45, at dalawang deformed bullets.

Ang suspek ay inaresto ng mga pulis at kasalukuyang naka-detain sa City Police Station. Inihahanda ang kasong murder at frustrated murder kontra sa kanya. Erwin Beleo at Jun Elias / ABN