2018 La Union Agri-Tourism Fest, naluktan

February 24, 2018 Headlines

SIUDAD TI SAN FERNANDO, LA UNION – Nalukatan ti 2018 La Union Agri-Tourism Festival iti maysa a ceremonial ribbon cutting a dinar-ayan ni Department of Public Works and Highways Secretary Mark Villar, Governor Francisco Emmanuel R. Ortega III, dagiti mayor ti local government units ti La Union, ken Department of Tourism Director Martin S. Valera idi Pebrero 19, 2018 iti Ortega Highway, ditoy siudad.
Impanamnama ni Villar a tumulong daytoy tapno malpas ti Convention Center iti Sevilla, San Fernando City, ken tapno mailayon ti Tarlac, Pangasinan, La Union Express (TPLEX) road inggana San Juan, La Union para iti naparpardas a panagbiahe dagiti turista nga aggapo iti Manila.
Nagkari pay ni Villar a tumulong daytoy tapno maikkan ti pondo ti rehabilitasyon ti clogged canals ti San Fernando City.
Iti mensahe ni Governor Ortega, impaganetgetna ti kinapateg ti Agri-Tourism iti pagilian.
“Agri-Tourism boosts the economy of the country. It alleviates poverty and uplifts the life of the poor,” kinuna na.
Innayon ti gobernador nga amin nga LGUs ti probinsia ket nasken nga aktibo a makipaset tapno agballigi ti programa ti La Union nga agbalin kas “heart of Agri-Tourism in Northern Luzon by 2025”.
Iti pannakipaset ti 19 nga il-ili ken daytoy a siudad iti lima nga circuit–Northen Circuit, Central Circuit, Central Eastern Circuit, Southern Circuit, ken Southern Eastern Circuit–naarkosan dagiti booths iti bukodda nga Agri-Tourism products tapno magutugot dagiti bisita ken turista a gumatang kadagiti lokal a produkto.
Mabigbig ken mapadayawan dagiti mangabak iti nagduduma a pasalip a paset ti festival inton Marso 5, 2018 iti Diego Silang Hall. BAUANG PIO / ABN