25 A LUGAR ITI ILOCOS REGION ADDA PAY LAENG ITI SIDONG TI ASF RED ZONE

November 30, 2024 Headlines

MALASIQUI, Pangasinan

Maiparit pay laeng ti panaggaraw dagiti sibibiag a baboy, karne ti baboy, produkto ti baboy, ken swine genetic
materials iti uneg ken ruar kadagiti 25 nga ili ken siudad iti Ilocos Region nga adda iti sidong ti red zone gapu iti
kaadda ti African swine fever (ASF) agingga idi Mierkoles. Segun iti Department of Agriculture Ilocos regional office (DA-1), 15 kadagiti apektado ti ASF a lokalidad ket adda iti Ilocos Sur, walo iti La Union, ken dua iti Ilocos Norte, ti kaudian a nainayon kadagiti naimpektaran a lugar.

Iti maysa nga interbiu idi Mierkoles, kinuna ni Dr. Allen Mae Doctolero, DA-1 regulatory assistant division chief, nga agtultuloy ti panangparegtada kadagiti agtartaraken ti baboy iti rehion a mangipatungpal kadagiti biosecurity protocols tapno malapdan ti ad-adu pay a panagwaras ti virus. “Kiniddawmi pay kadakuada a dida suportaran dagiti baboy manipud kadagiti red zone ken dadduma pay nga illegal a produkto a maiyeg iti rehion,” kinunana.

Nainget ti panangipatungpal dagiti maseknan a local government units (LGUs) iti quarantine, pananglapped iti
panagdaliasat ti karne ti baboy ken dagiti produkto a naggapu iti karne ti baboy, ken culling (panangpapatay) no
kasapulan, kinunana. Iti napalabas, ti polisia ket ti panangpapatay kadagiti amin a baboy iti uneg ti 1-km. radius ti lugar a nakaisaadan ti naimpektaran nga animal. Daytoy, nupay kasta, ket narebisar idi napan a Setiembre, a ti nasaklaw a lugar ket napababa iti radius a 500 a metro.

Mapukan dagiti baboy a nagpositibo iti virus ngem dagiti mapaneknekan a negatibo ket kasapulan a maiyeg a dagus iti pagpartian ti lugar ken mailako kadagiti konsumidor, a ti naud-udi ket agpannuray pay laeng iti desision ti maseknan nga LGU. Manipud Hulio agingga iti Setiembre ita a tawen, addan 2,470 a culled pigs iti La Union, 900 nga ulo iti Ilocos Sur, ken 80 iti Ilocos Norte. Adda 353 a hog raisers a naapektaran iti la Union, 111 iti Ilocos Sur, ken 19 iti Ilocos Norte.

Kinuna ni Doctolero nga umawat dagiti apektado nga agtartaraken ti baboy iti bayad manipud iti DA para kadagiti
napapatay a baboyda nga agdagup iti PhP4,000 kada ulo para kadagiti urbon a baboy, PhP8,000 kada ulo para kadagiti grower ken fattener, ken PhP12,000 kada ulo para kadagiti breeder. Tunggal agmulmula iti baboy ket mabalinna nga agkiddaw ti agingga iti 20 nga ulo. Dagiti 19 a hog raisers iti ili ti Rosario, La Union, a nakairekord dagiti immuna a kaso ti ASF ita a tawen, nakaawatda iti total indemnification a PhP595,000 idi Setiembre, kinuna ni
Doctolero.

Bakuna

Nagatangen ti DA dagiti bakuna ti ASF, ket naiwaras dagitoy idiay Batangas para iti umuna a pannakasubok. Kinuna ni Doctolero nga ur-urayenda pay laeng ti pannakai-download dagiti bakuna iti rehion manipud iti central office.
Kinunana a mabalin a nakatulong ti layus iti panagwaras ti ASF virus iti dadduma a lugar. “Gapu ta dandanin malpas
ti panawen ti tudo, namnamaenmi nga agsardeng ti panagwaras ti virus,” kinunana. Kabayatanna, awan pay ti naawat ti DA a report ti kinakirang ti karne ti baboy manipud kadagiti probinsia, innayonna.

(HA-PNA Ilocos/PMCJr.-ABN