3 binatilyo nang-rape sa Baguio; tanod nang-rape ng bata sa Ifugao

October 21, 2017 Headlines

LUNGSOD NG BAGUIO – Tatlong binatilyo ang diumano ay nanggahasa ng isang lasing na babae sa loob ng isang sasakyan sa Leonard Wood Road, Baguio City habang isang 42 anyos na barangay tanod ang naiulat na ilang beses na ginahasa ang isang 6-anyos sa Ifugao noon pang nakaraang buwan ngunit kamakailan lamang inireport sa otoridad.
Sa ulat ng pulis, isa sa tatlong binatilyo ang diumano ay nag-alok na ihatid ang isang lasing na babae sa boarding house nito ngunit habang nasa loob ng sasakyan ay pinaghahalikan ng binatilyo ang babae na humantong sa pakikipagtalik. Pagkatapos nito ay pumasok din sa loob ng sasakyan ang dalawa pang binatilyo at ginahasa rin ang biktima.
Nagawa ng biktima na makalabas sa sasakyan at humingi ng tulong sa isang nakatambay para pumara ng taxi at agad dumiretso ang biktima sa pulis.
Nagawa namang sundan ng mga pulis ang tatlong suspek at nakorner ang mga ito.
Samantala, sa Ifugao ay tinutugis ang isang tanod upang panagutin sa batas matapos na makatanggap kamakailan ng reklamo mula sa isang ina na diumano ay ginahasa ang anak nitong 6 anyos noong Setyembre 20, 2017.
Kinilala ang barangay tanod na si Allan Binwag Bunnat, 42, ng Bullod, Tam-an, Banaue.
Sinabi ng ina sa pulis na ang biktima ay nakikipaglaro sa pinsan nito nang tinawag ito ng tanod at dinala sa kwarto.
Aniya ay tinanggal ng tanod ang pang-ibabang saplot ng biktima at ipinasok ang daliri sa maselang parte ng katawan ng biktima.
Sinabi pa ng ina na ayon sa anak ay ilang beses itong inabuso ng tanod.
Ang biktima ay sinuri ni government physician Mae Diaz at agad na isinangguni sa Municipal Social Welfare and Development Office para sa counselling.
Ang tanod ay nakatakas ay ngayon ay tinutugis ng mga pulis habang inihahanda ang kaso kontra sa kanya. ACE ALEGRE / ABN