4 nga ili ti La Union naipasidong iti MECQ

April 10, 2021 Headlines

SIUDAD TI SAN FERNANDO, La Union – Gapu iti agtul-tuloy a panagngato iti bilang ti kaskaso ti coronavirus disease 2019 (COVID-19) sadiay La Union, impatungpal ni Governor Francisco Emmanuel Ortega III iti naing-inget a community quarantine iti uppat nga ili.
Idi Martes, Abril 6, pinirmaan ni Ortega iti Executive Order No. 8, series of 2021 nga mangiprokproklamar kadagiti ili ti Aringay, Luna, Naguilian, ken Tubao iti sidong ti maysa a modified enhanced community quarantine (MECQ) manipud Abril 8 agingga Abril 21.
Impakaammo iti Gobernador iti EO nga imprisinta iti Provincial Core Team Against COVID-19 nga agingga Abril 5, dagiti nasao nga lugar ket adda iti critical epidemic risk level nga addaan iti nasurok a 50 porsiento ti barangayda ket naaddaan iti baro a kaskaso. Sadiay Aringay, 14 iti 24 a barangay ket naakaran iti virus; 27 iti 40 idiay Luna; 29 iti 37 idiay Naguilian; ken 16 iti 18 barangay idiay Tubao.
Sigun kenni Adamor Dagang, provincial information ken tourism officer, dagiti opisiales ti maseknan a local government units (LGUs) ket nakonsultar ken immanamong sakbay iti deklarasion iti nainginget a klasipikasion kadagiti lugarda.
“This move of the provincial government is to arrest the further spread of COVID-19 in said LGUs and to benefit its surrounding municipalities as well as the province, in general,” kuna ni Dagang.
Gapuna, kunana a dagiti local chief executives ken lokal a polisia ket nabilinan a masigurado ti panagtulnog iti Operational Guidelines on the Application of the Zoning Containment iti lokalisasion ti National Action Plan against COVID-19 Response ken dadduma pay a pagannurotan nga aplikable iti bayat ti panakaipatungpal ti MECQ.
Mairaman kadagitoy iti implementasion ti estrikto a limitasion iti panaggaraw ken panagbiahe daiti tattao, panangikabil kadagiti checkpoints, panangtungpal iti minimum public health standards, panagserra kadagiti non-essential establishments, ken estrikto a regulasion ti panangpataray kadagiti industria, panangipatungpal kadagiti curfew, ken nainget a presensia dagiti unipormado a personnel tapno ipatungpal dagiti pagalagadan.
Agingga 10 p.m. ti Abril 6, addaan 1,336 aktibo a kaskaso ti COVID-19 iti La Union.
JPD, PIA LU/PMCJr.-ABN