48 kumpanya, makikiisa sa Labor Day jobs fair

April 22, 2017 Metro BLISTT

Halos 48 na mga kumpanya mula sa lokal at nasyonal ang makikiisa sa taunang Labor Day jobs fair na gaganapin sa Baguio Convention Center sa Mayo 1, 2017 mula 8am hanggang 5pm.
Ayon kay Executive Assistant IV ng City Mayor’s Office at Public Employment Service Office (PESO) Manager Designate Jose Atanacio na sa makikilahok ng mga kumpanya, 33 dito ay magbibigay ng trabaho pang-lokal samantalang ang 15 kumpanya ay mag-aalok ng trabaho sa iba’t ibang parte ng mundo para sa mga interesadong aplikante.
Ang taunang Labor Day jobs fair ay pinangunahan ng lokal na pamahalaan at ng Department of Labor and Employment (DOLE)-Cordillera upang matulungan ang mga residente na makahanap ng trabahong makatutulong sa pag-angat ng pamumuhay ng kanilang pamilya.
Ang mga makikilahok na local companies ay ang FC Laranang Group of Companies, Isonn Marketing, John Hay Management Corporation, SITEL Philippines Corporation, SM Super Value Inc. (SM Supermarket), The Manor at Camp John Hay, Monol International School, Baguio Country Club, Mainstream Business Inc., Tiong San, City Light Hotel, 51 Talk Philippines, SM National Book Store, Triple A, Pines International Academy, Sutherland Global Services, IQOR Phils. Inc., Philippine Drug Enforcement Agency-Cordillera, Convergys, Jollibee Food Corporation, HEDCOR Inc. (Aboitiz Power Company), Expression’s Stationary Shop Inc./Mart One Department Store, Sunshine/Mcdonald’s/Hotel Veniz, Ace Hardware Philippines Inc., RRJ Greatsit Makers Inc., Jenmen Engineering, Tree Top Adventure, SM Toy Kingdom, SM Appliance Center, SM Homeworld Shopping Corporation, SM Baby Company, Chowking, at Summit Bank/Prime Hotel.
Gayunman, ang listahan para sa mga lalahok na kumpanya para sa overseas employment ay hindi pa naihahayag ng Philippine Overseas Employment Administration (POEA) dahil isinasaalang-alang ang validation na isinagawa para sa mga bakanteng posisyon at ang job order mula sa bansang nais na puntahan.
Payo pa ni Atanacio sa mga aplikante pang-lokal at overseas na magdala ng maraming set ng credentials na maaaring isumite sa iba’t ibang kumpanyang nangangailangan ng kanilang serbisyo upang magkaroon sila ng pagkakataong makakuha ng trabaho, kahit pa right on the spot oras na magustuhan ang kanilang credentials.
Pinaalalahanan pa niya ang mga aplikante na pumunta sa jobs fair nang maaga upang mas masiyasat ang mga kumpanyang nais nilang pagbigyan ng kanilang aplikasyon pang-lokal o pang-overseas.
Bukod sa Labor Day jobs fair, pangungunahan din ng lokal na pamahalaan ang pangangasiwa ng Kalayaan jobs fair sa darating na selebrasyon ng Independence Day at ng Baguio Charter Day jobs fair na parte ng aktibidades na nakahanda para sa month-long celebration ng Charter Anniversary ng lungsod. PIO / ABN