AASENSO partylist, naglaan medical assistance sa Baguio-Benguet

Community Billboard

LUNGSOD NG BAGUIO – Magandang balita para sa mga indigents na walang kakayahan para matustusan ang kanilang pagpapagamot sa ospital, dahil mahigit sa P900,000 medical assistance ang inilaan ng AASENSO Partylist para sa lungsod at karatig-lalawigan ng Benguet.

Bukod dito, umaabot sa P36 milyon na mga infrastructure project ang sinuportahan sa iba’t ibang lugar sa Northern Luzon sa ilalim ng kanilang programang HELP (Health, Education, Livelihood and Protection of people’s right).

Ayon kay Atty. Isagani Nerez, national chairman ng AASENSO (Ating Aagapay Sentrong Samahan ng mga Obrero Inc.), noong 2016 ay nag-ayuda sila ng P300,000 para sa medical assistance sa Baguio General Hospital and Medical Center (BGHMC) at additional na P300,000 noong first quarter ng 2017.

Sa Benguet, ang AASENSO partylist ay nag-ayuda rin ng P150,000 sa Benguet General Hospital at P150,000 sa Abatan Emergency Hospital sa Buguias, Benguet.

“Sa kababayan ko sa Baguio, lalong-lalo na sa mga indigents na bagama’t maliit na pondo lamang ito ay malaking tulong at marami na ang matutulungan, dahil mahalaga ito sa taong kapuspalad,” pahayag ni Nerez.

Sa mga gustong makakuha ng medical aid ay magsumite lamang ng medical abstract at certificate of indigents at makipag-ugnayan kay Sammy Bumangil, focal person ng AASENSO Partylist sa Baguio City.

Sa mga community project, kasalukuyang ginagawa ngayon ang Multi-Purpose Building ng Barangay Camdas at Barangay Palma sa halagang P2milyon bawat isa; P2milyon para sa Barangay Tinongdan, Itogon, Benguet at P3milyon para sa flood control project ng lalawigan ng Benguet.

Ayon pa kay Nerez, bukod sa programang HELP ay pagtutuunan naman nila para mapondohan sa susunod na taon ang programang edukasyon, para sa pagpapatayo ng alternative learning center sa lungsod, kabilang na ang education center para sa mga Muslim.

“Mas mainam na may sariling learning center ang mga Muslim para mahikayat natin ang mga kabataan na mag-aral, sa halip na nakikita natin sila sa lansangan,” paliwanag pa ni Nerez.

Sa Ilocos region ay nag-ayuda ang partylist sa proyektong flood control sa Laoag City na P3milyon; P2milyon na Multi-Purpose Hall sa bayan ng Sarrat at P2milyon sa Badoc Elementary School; P2milyon sa Bugallon Elementary School sa Pangasinan at P20milyon flood control sa 2nd district ng Pangasinan. ABN/Zaldy Comanda