AD-ADU NGA IGOROT DOKTOR ITI MAIMATANGAN ITI PANANGINAGAN TI UMUNA NGA SUC MEDICAL SCHOOL ITI CAR

January 6, 2024 Headlines

LA TRINIDAD, Benguet

Agyaman dagiti opisial ken nagannak iti Cordillera para iti linteg a nangipasdek iti maysa a medical
college iti sidong ti Benguet State University (BSU), a kunada a daytoy ti mangpalubos iti rehion a
mangpataud iti ad-adu a doktor. Pinirmaan ni Presidente Ferdinand R. Marcos Jr. idi Diciembre 20 iti Republic Act (RA) 11970, a nangipasdek iti maawagan itan nga Benguet State University-College of Medicine.

Imbaga ni Benguet Governor Melchor Diclas, iti maysa a mensahena idi Lunes, nga agyaman daytoy kenni Presidente para iti panagpirma iti maysa a tignay, kasta met kenni Benguet Lone District Rep. Eric Go Yap “para iti panangitandudona iti House Bill No. 312 a nangipasdek iti
pundasion ti gannuat.”

“Ti pannakaipasdek iti Benguet State UniversityCollege of Medicine ket naisangsangayan gapu ta dayta’t agbalin nga umuna a kita iti probinsia tayo ken umuna a state university iti rehion a mangidiaya ti Doctor of Medicine. Tumulong daytoy a mangpataud iti ad-adu pay a mangngagas saan laeng nga iti Benguet ngem kasta met iti rehion, bayat nga gatulytuloy a tamingentayo dagiti kritikal a kasapulan ti sistematayo iti panangtaripato iti salunm-at,” kinunana.

Imbaga ni Diclas a maysa a siruhano, daytoy a panagduras ket manamnama a mangpapigsa iti “Study Now, Pay Later” program ti probinsia para kadagiti agtarigagay a doktor manipud 13 a
munisipalidad ti Benguet, a mangipaay iti tulong pinansial babaen iti tuition fees, book allowance, ken sustento. “Ti masakbayan iti healthcare ti Benguet ket naraniag, ken agtalekak a dagiti masanguanan nga agturpos iti Benguet State UniversityCollege of Medicine ket dakkel ti akemda iti panangsukog iti nasalsalun-at a Benguet ken nasalsalun-at a Cordillera,” imbagana.

Ti ideya a pananglukat iti maysa a kolehio ti medisina sadiay BSU ket nagtaud manipud iti pannakaisaad kenni Felipe Comila kas prresidente ti unibersidad idi 2018, a dagiti pagbatayan ket nangrugi iti dayta. Imbaga ni Comila nga iti umuna a 50 slots, a mabingbingay iti dua a seksion,
iti maipaayto para kadagiti agtarigagay a doktor no mangrugi iti klase iti Agosto. Mapaadu iti bilang agingga 60 nga estudiante iti kada tawen.

Imbagana nga iti BSUCollege of Medicine ket mangpalubos iti ad-adu pay nga Igorot a maaddaan iti panagpampanunot ken panagtalek a mangala ti medisina iti laksid ti kinakurang ti pinansial.
Maipalagip nga iti Republic Act 11509 wenno iti “Doctor para sa Bayan Law” ket pinirmaan ni Presidente Rodrigo Duterte idi Mayo 2021, a mangipaspasdek iti maysa a medical scholarship and return service program para kadagiti maikari nga estudiante iti State Universities and Colleges (SUCs).

(LA-PNA CAR/PMCJr.-ABN)