Agaw bahay, bagong kontrobersiya!

Haayyy buhay, kung ano-anong kontrobersiya na ang naging bida sa lahat ng mga tsismisan at umpukan sa nakalipas na mga araw. Ang pinakahuli nga ay yung “palit ulo” sa kampanya vs. droga. Kung uso rin sa mga blotter ng pulisya ang kasong “agaw-armas” at “agaw-puwesto” sa trabaho, may nagbabaga pa ngayong bagong “agaw”. Ito ang “agaw bahay”! Mariakusina, akala ko agaw-lote lang. Pati bahay pala, isinama. Ano ire? Sige, halukayin natin, hane?

**********

Unang linggo ng Marso sa kasalukuyang taon, nang inukupahan ng mahigit limang libong Kadamay members ang mahigit ding limang libong housing units sa Pandi, Bulacan. Ang naturang pabahay na ginawa ng gobyerno ay laan sa mga sundalo at pulis. Pero parang kidlat ang balita na nandun na sa units ang mga miyembro ng Kadamay – Kalipunan ng Damayang Mahihirap. Nagkaroon ng komprontasyon at mga pagtuligsa sa naturang kaganapan. Nagmatigas ang mga taga-Kadamay at ayaw lisanin ang pabahay. Ang katuwiran nila: bakante raw naman ang mga pabahay at tila ayaw tirahan ng mga sundalo at pulis kaya dapat daw ay ipamahagi na lamang ito sa mahihirap na matagal ng walang bahay. Sabi ng mga legalista: illegal ang naganap. Nakalaan sa mga pulis at sundalo ang pabahay hindi sa kung sino pa man dahil idinaan ito sa masusing pag-aaral, letigasyon sa kongreso at pagsasakatuparan sa proyekto. Kahit pa raw may pagkukulang ang pamahalaan kung bakit tiwangwang ang mga housing units, isang illegal na hakbang ninuman na basta pasukin at angkinin na lamang ito. Pero ano ang naging hakbang ng pamahalaan? Ayon kay Pangulong Duterte: hindi na raw babawiin ang mga bakanteng housing units sa mga umuukopang Kadamay members. Susmaryusep!!!

**********

Parang putok ng bulkang sumabog ang mensaheng binitawan ni Pres. Digong sa ika-129 taong anibersaryo ng Phil. Army kamakailan. Sabi ng pangulo: “I will build them new, better homes.” Patungkol sa mga pulis at sundalong nawalan ng pabahay. Dagdag pa ng pangulo: I ask the soldiers to let go of the housing units occupied by Kadamay members in Bulacan. Bigyan ko kayo ng mas maganda, mas konting mahal, mas komportable, at mas malaki (na housing). Do not be offended. Take it with an open mind. Ako na mismo inyong president nakikiusap, let’s not wage fight vs. our own people.” Mabigat, di po ba? Marami ang napanganga at nagulat sa mensaheng ito ng presidente at sa panig ng mga Kadamay, tiyak sila lahat ay natuwa at nagpasalamat. Aba’y mantakin mong wala silang kahirap-hirap, basta na lamang inukupa at gusto ng angkinin ang mga housing units na para sa mga sundalo at pulis? Saan nila daw kinuha ang kanilang lakas ng loob na gawin ito? At anong ginawa ng pangulo? Ibibigay na lang basta (nang libre) ang units?

**********

Katakot-takot na mga batikos, tanong at upak ang kasunod sa desisyon ng pangulong Digong. Sabi ng marami: pera ng buong bansa (taxpayers) ang ginastos sa pabahay. May pinaglaanan. Hindi napunta sa kanila kundi inagaw ng iba. Hindi sila naparusahan. Ibinigay pa sa kanila ang inukupahang pabahay. Papaano na lang kung ganyan din ang gawin ng iba pang grupo para pasukin ang iba pang pabahay ng gobyerno? Di kaya babagsak tayo sa anarkiya? Sabi ng isang senador, itutuloy nila ang kanilang imbestigasyon sa Kadamay issue kahit pa may basbas na si Digong sa kanila. Sabi ni Sen. Richard Gordon: “Kinukuha yung bahay na ginagawa ng NHA (National Housing Authority), ibibigay mo dun sa mga nanggugulo. Bad signal, Mr. President. Nadadapa ka sa sarili mong espada because pagka ganiyan, that’s a ticket to what you call anarchy!” Sa ganang amin, lahat ay dapat sumunod sa batas at tamang proseso para magkaroon ng bahay. Isang kasalanan ang pagiging mahirap kung tayo ay tamad at di marunong magsikhay. Amen. Adios mi amor, ciao, mabalos!

Amianan Balita Ngayon