Agawaam Kayong, parking ka latta!

September 7, 2019 Sirmata ken Tagtagainep ni Mang Gusting

Naimbag a malem, agsapa, wenno rabii yo amin kakaarruba, gagayyem ken kaginginnura hehehe, sapay la koma ta napia kay latta a kanayon nangruna kadagiti sukimi nga ABN READERS.

Panawen manen ti nepnep kailian, agannad tayo koma laeng. Adda man bagyo wenno awan ditoy batug mi a langit, no nakalagip, manso latta ti todona.

Bayat a sursuraten mi daytoy, Kakayong, nakaruaren ti bagyo Liwayway iti PAR ngem adda latta dagiti lugar a no sadino ket adda panagtodtodo na maigapu iti habagat a kuna da wenno monsoon rain. Pabor dayta kadagiti kailian tayo a mannalon.

Ayna, Kayong, nadakamat tayo dagiti kailian tayo a mannalon nga isu’t ibilbilang tayo a banuar ti pagilian ta isuda ti manggamgamulo ken Ina a Daga tapno adda mapataud a kanen wenno taraon tayo nga umili. Isu ti maibilang a banuar ta isuda met maibilang wenno makuna a dori ti pagilian, kas iti nakuna tayo, rumbeng a dagiti mannalon ti maitag-ay ti kasasaad da, ngem anian a nagkas-ang ti damag ita maipapan iti biag dagiti mannalon.

Naglaka ti balor ti tunggal kilo nga irik idinto ta nagngina ti outputs da a makuna wenno dagiti gatangen da a kasapulan iti panagtalon da kas koma kadagiti abuno ken dadduma pay.

Husto la unay ti kuna daydi Apong ko. Uray puyotem ti kunak gustilo kuna na. No saan ton a malapdan ti kina-agum ti tao, agbanag to a nakakaasi dagiti nakakaasi, agrigat dagiti marigrigat ket bumakbaknang latta met dagiti babaknang kuna na. Isu nga awan latta, kayong. Naidugmam ti sirmata ken tagtagainep ta para iti masakbayan.

Tay kunada ngarud, ni Angkuan, agtalinaed nga agtungtunglab ti biag na ta adu latta dagiti buwaya.

Maisabaliak man iti topiko Kayong Angkuan. Nagpintas daytoy nabasak a Memorandum Circular No. 2019-121. Daytoy ket maipapan iti Presidential directive idi 4th State of the Nation Address ni Pres. Duterte maipapan iti pannakadalus wenno pannakawaknit dagiti kalsada kadagiti llegal structures and construction.

Nagmayat man ken dayawek la unay ti ganuat wenno action nga ar-aramiden ti kabarbaro a Mayor ti Manila a no sadino ket adun ti naikkat kadagiti makuna nga obstruction iti bangketa.

Limmawa wenno limmawagen dagiti kalsada a pinagbalin da a market wenno paglakuanen. Malaksid iti pannakadalus dagiti bangketa, nawaya metten ti kalsada manipud iti illegal parking ta adda pay diay akinbatug pinagbalinnan a parkingan ti batug na.

Nagaramid payen iti garahe na a sumilpo iti kalsada! Ditoy Baguio, adda met kabarbaro a city ordinance a no sadino ket maipatungpal ti makuna a towing kadagiti lugan a nakaparking kadagiti kangrunaan a kalsada ti siudad.

Ngem kanayon nga ibaga ken damdamagen. Ania kadi nga agpayso dagiti kalsada ditoy siudad ti sakupen dayta nga ordinansa? Ditoy laengen lugar mi, koma a ket no agalas siete, maawan metten dagiti nagpatnag a nakaparking ken agmalmalem dita.

Kas iti nakuna tayo, adda met dagiti napusgan a barangay officials ken barangay tanod nga agbaklas kadagiti car plate wenno plaka dagiti luglugan, ngem how often nga aramiden da daytoy?

Agdamdamag kami laeng, kakabsat. Uray dagiti manun a tawen a nakaparada kadagiti interior roads, pinagbalin dan a kasla tambakan ti dadael a lugan dayta a paset ti kalsada. Naireklamo metten kadagiti elected barangay officials ngem disanda kaya ti akin-lugan.

Adda dagiti barangay nga alas saisen ket nakaparking pay laeng ta lugan mo, ikkaten dan ti plaka na. Koma saan laeng nga ikkaten. Mai-clamp koma dagita wenno maiguyoden.

Iti kangrunaan a kalsada ditoy ayan mi Kayong Angkuan, masuroka a talaga ta awan met serbi diay widening ta nagbalin met a parkingan. Diaske a kunada! Isu a sige, agawaam Kayong. Parking latta!