Agmulta, maibalud ti agiwara basura

April 1, 2017 Provincial

BANGUED, ABRA – “Saankayon agiwara basura no diyo kayat agmulta wenno maibalud!”
Dayta ti nainget a ballaag ti Republic Act No. 9003, ti makunkuna nga Ecological Solid Waste Management Act ti 2000.
Impaganetget ni Engr. Joyce Ann Managsat, “Reyna ti Basura” ti Abra manipud ti Department of Environment and Natural Resources-Cordillera Administrative Region (DENR-CAR), kadagiti agsasaganad a panangsanayda kadagiti Abrenios iti Waste Analysis and Characterization Study (WACS) iti naduma-duma nga il-ili ditoy probinsia.Ti WACS, makalawas a panagsanay a  maisaysayangkat iti agdama tapno maitrabaho ti pannakaurnong dagiti basura ken maadal dagiti kita ken kaadu ti ibasura iti inaldaw manipud kadagiti pagtaudan ti basura kas kadagiti pagtaengan, pagadalan, opisina, ospital ken pasdek negosio kas ti panganan, hotel, paglinglingayan ken dadduma pay nga umasping a negosio.
Maaramat ti resulta ti WACS a pagbasaran ti gobierno-lokal a mangdisenio iti Solid Waste Management Program da a mangsungbat iti parikot ti basura iti masakupan da nga ili.
Maipakaammo nga adda 11 nga ili ditoy Abra a naglabsing ti RA 9003 kas nakita babaen ti satellite a dagitoy ti addaan dumpsite ken saanda a naipatungpal dagiti karida mainaig ti panangipatungpal ti nasao a linteg.
Gapu ti dayta a panaglabsing, umayto bisitaen ti mismo a commissioner ti National Solid Waste Management Commission ken ti Environmental Ombudsman dagiti  11 nga LGUs ditoy Abra tapno maiseguro ti panangtungpal da kadagiti kari da mainaig ti pannakaiduron ti programa ti Solid Waste Management.
No dida ipatungpal ti nasao a linteg, dagitoy ti maisaklang ken mamulta wenno maibalud ti opisial da segun ti kadagsen ti paglabsinganda.
Dagitoy dagiti 11 a munisipio a mabisitanto: Boliney, Daguioman, Lagayan, Langiden, La Paz, Licuan-Baay, Malibcong, Manabo, Tineg, Tubo ken Villaviciosa.
Ingunamgunam pay ni Mangsat kadagiti nagsanay manipud barbarangay a nasken a dasigdasigenda dagiti basura tapno maksayan, mausar ken mailako dagiti mabalin pay a ma-recycle (Reduce, Reuse and Recycle) nga  basura tapno isu pay a pagkwartaanda. MTBB/PIA Abra / ABN