Agsasallupang

May 8, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada. Iti panagsarak manen dagiti agkumpare Jun ken Mang Gusting ket—

Gusting: Pare Jun, ammok a dimo nasagang daytoy a saludsod.

Jun: Ania kadi dayta Pare Gusting.

Gusting: Ania ti kangrunaan a serbi wenno usar ti lalat ti baka, Pare Jun. Ala, sungbatam man. Ilibre ka iti Kola no masungbatam.

Jun: Sus, naglaka! Di sapatos.

Gusting: Hahhahaa, kunak la ngaruden a dimo ammo.

Jun: No saan a sapatos, di bag.

Gusting: [katawa more] ad-adda manen a saan, Pare.

Jun: Mistake latta? Ania ngrud…ow, di petaka, wallet.

Gusting: Awan latta, saanmo a masungbatan.

Jun: Barikes a lalat.

Gusting: Awan, Pare Jun, siak ti painumem.

Jun: No saan a dagiti imbagak, ania ngarud?

Gusting: Di agserbi a bado ti  baka.

Wahahahaahhahaa!

Bueno kakayong, kailian, agkatawa dagiti mayat, ah. Oopsss, dikay agmurareg ah, dakes ti kanayon a nakasiddunget. Kunada ngarud, laughter is the best medicine. Isu nga agkatawa wenno umisem kayo nga uray agsasamusam dagiti intay paspasaren a parikut. Kitaem ni Pare Jun ket tunggal agkita kami manglapayag ti isemna. Kasta, ah! Tapno maksayan ti uged iti mugging! Saan a bale nga awanen buokna, hahaha!

Mayo 4, mangrugin ti panagkakampanya nga aggibus inton Mayo 12. Bayat a sursuraten tayo daytoy a kolum tayo kakayong ken kabarangayan nangrugin nga agibalaybay dagiti kandidato kadagiti posters da. Ditoy ayanta a batug, maysa a sipsiputanta dagiti pangikabkabilanda iti posters ta no adda aglabsing picturenta man ta ipanta iti komelek. Koma, surotenda met dagiti naituding a kadadakkel ti posters.

Kadakayo a kabarangayan, lima a tawen ti napalabas nga awan barangay election ket dandani manen nasaaw ita. Kayatna a sawen, no saan kayo a kuntento kadagiti barangay officials yo iti daytoy naglabas a panawen, arigna dusa dayta nga intay baklayen, saan aya? No kasta ngarud, nasken nga ipodosan tayo a nasayaat ken arisiten itan dagiti namnamaen tayo  a makabael ken sipupudno nga agserbi saan ketdi a gapu ta kumpare ken kumare tayon diay tao isu metten ti intay ikur-it iti ballot. Kalpasanna tumanabutob tayonto no awan maar-aramidanda. Itan kabarangayan ti panawen nga intay panagpili kadagiti agbalin nga opisyal tayo iti barangay.

Maipudosan tayo ida iti simple a wagas, kitaenyo laeng no asino dagiti natulnog, dagiti agtungpal iti husto a lugar a pagisab-itan kadagiti posters da. Iti makuna a designated ti Comelec. Saan a mangpadpadakes iti padana a kandidato. No ania ti status ti pamiliana, mapagguadan ba wenno nakiru a kunada ti family background na, napakumbaba…dagita ti kangrunaan, kabarangayan.

Nupay agsasallupang dagiti kndidato, koma awan minnusotan, tay kunada a friendly game latta koma. Sports lang a kunada. No maabakka, ania ngarud…sipupuso nga awatem ta kasta laeng daytoy pulitika. Natural nga adda maabak, adda mangabak. Awan dinnadael, kanya-kanyang diskarte ngem saan ka makapasakit ti padam a tao wenno kandidato ta inaldaw kayto met laeng nga agkita a kunada ta agkabarangayan kayo ngarud. Ngem natural san nga iti pulitika pagsisinaenna dagiti sigud a nasinged nga aggayyem, kas ditoy lugarmi. Dagiti sigud a nasinged, ita nagkalabandan iti kina-kapitan. Waaaa…what a life a kunada, para dayta laeng nagsinnublian kayon iti kandela!

Ala, kadagiti amin a kandidto iti kinakupitan este kina-kapitan ken kadagiti kandidato para kadawat este kina-kagawad, “good luck” kadakayo amin. Koma, peaceful and orderly barangay election.

Ala ngaruden, kasta pay kakayong ta ne, overtime tayo manen. Ala, kasta pay ket ne, nakaadu tayo manen. Babayoo, tsup tsup muahmuah.