Ala-Gestapo na grupo laban sa kritiko ng gobyerno binuhay

October 14, 2017 Metro BLISTT

Isang grupo na ala-Gestapo ang binuhay ng gobyerno upang habulin ang mga kritiko at oposisyon ng gobyerno, ito ang babala ng militanteng Bagong Alyansang Makabayan.
Noong Oktubre 9 ay pinirmahan ng Philippine National Police at Armed Forces of the Philippines ang isang memorandum para likhain ang Interagency Committee on Legal Action na ayon sa Bayan ay isang pagbuhay sa Interagency Legal Action Group na binuo ni dating pangulo Gloria Arroyo noong 2006.
Ang bagong likhang Interagency Legal Action Committee ay layong magpila ng mga kaso laban sa New People’s Army at iba pang armadong grupo.
Subalit sinabi ni Bayan secretary general Renato Reyes na “if we go by the track record of its predecessor the IALAG, the Committee will likely end up as an instrument of political persecution.” Magiging isang Gestapo o secret police ito ng rehimen ni Duterte na tututok sa mga kritiko ng gobyerno, dagdag pa ni Reyes
Ang IALAG sa ilalim ni pangulong Arroyo ang sinisi sa pagpila ng diumano’y imbentong kaso laban sa maraming legal activists kabilang na ang Batasan 6, isang grupo ng progresibong partylist, mambabatas at ilang makakaliwang personalidad.
Inirekomenda ni United Nations Special Rapporteur Philip Alston noong 2007 ang abolisyon ng IALAG dahil walang ibang hangad ito kundi ang “usigin ang kaliwa.”
Noong 2008 matapos ang matinding international pressure ay nagpasa ang US congress ng batas na hinihiling na ang United States Military aid ay maging kundisyon sa implementasyon ng ulat ni Alston maging ang abolisyon ng IALAG.
Kasunod nito ay binuwag ni Arroyo ang IALAG noong Mayo 15, 2009.
Dahil sa lubos na nakakadismayang sitwasyon ng karapatang pangtao sa ilalim ng rehimeng Duterte, ang pagbuhay sa Interagency Committee on Legal Action ay hindi malayong matutulad din sa IALAG, pagdidiin ni Reyes. “It will be used to clamp down on dissent from Duterte critics through the filing of trumped-up charges and other forms of harassment.”
Ang inter-agency group ayon sa Bayan ay isa na namang aspeto ng paniniil sa ilalim ng US-backed Duterte regime, at nagbabalang dapat maging mapagmasid ang tao at labanan ang politikal na pag-uusig at lahat ng uri ng paniniil.
Bagkus ay sinabi ng Bayan na dapat tanungin ng international community ang kasalukuyang administrasyon kung bakit binaliktad nito ang isang mahalagang rekomendasyon ng UN Special Rapporteur. Dapat hilingin ng mga human rights activists dito at sa ibang bansa na itigil ang US military aid sa Pilipinas dahil dito at iba pang katulad na pangyayari. ABN