Anak daw ng kongresista, kulong sa kayabangan!

November 17, 2018 Daplis Walang Mintis Opinion

Itinanggi ni Pampanga Congressman Carmelo Lazatin na anak niya ang isang lalaking nagmaneho ng isang FJ Cruiser at idinagdag niyang hindi kanya ang naturang sasakyang may plakang 8 o otso. Ang kanyang mga anak daw ay pawang mga minors pa. Bilang dagdag kaalaman ang plakang 8 (otso) ay iniisyu ng Lower house sa mga kongresistang may sasakyan. Pero ayon sa mga ulat may mga umaabuso dahil dito. Kaya dahil sa nangyari sa Angeles City kamakailan umaksiyon na ang Lower House sa pamamagitan ni House Speaker Gloria Arroyo. Pinare-recall na niya ang lahat ng mga protocol plates na inisyu ng 16th congress. Dapat lang sundin ng mga kinauukulan bago sila maharap sa asunto. Pero ano ba yong viral video ng abusadong driver na ikinagalit ng ilang nitizens? Sundan:

**********

Kita raw sa viral video na nanggitgit, nagwawala na parang gustong makipagbanggaan ang FJ Cruiser sa mga sasakyang bumabaybay sa Congressional Avenue sa siyudad ng Angeles kamakailan. Maraming motorist ang muntikan nang madamay, maperwisyo at maabala dahil sa kagagawan ng nagmamanehong suspects mula sa humaharurot na FJ Cruiser. Sa imbestigasyon ng pulisya, may plakang 8 ang sasakyang minamaneho ng isang nagngangalang Jojho Valerio na inakala o hininala ng marami na anak siya ng isang kongresista. Huli din sa CCTV camera na may sinapak ang suspect at sinabing Kongresista ang ama nito. At dahil itinanggi ni Cong. Lazatin ang pagyayabang ng suspect, inaresto ito detenado ngayon sa Angeles City Station 4. Ang malaking katanungan ngayon ay: kanino ang FJ Cruiser na minaneho ni Valerio? Bakit 8 ang plaka nito? Daplis ng marami, maski pa anong plaka ng iyong sasakyan at maski pa sino ka pa, hindi ka dapat maghari-harian sa daan. Lahat tayo ay may karapatan sa ating mga daan, hindi lang para sa isa o iilang abusado sa lipunan.

*******

Sa ating balik-tanaw marami na tayong nakitang iba’t ibang klase ng plaka ng sasakyan. May mga letrang tatak ng mga ahensiya kasama na ang mga ahensiyang ang responsibilidad ay sa lansangan at mga ahensiyang kontra krimen. Kasama rin ang mga ahensiyang malaki ang impluwensiya sa lipunan na maaring dahil sa kanilang programang makalikum ng pondo para sa kanilang serbisyo sa bayan, naglalabas sila ng mga plaka kapalit ng kaunting donasyon o tulong pinansiyal. Pero bago i-release ang mga special car-plates, may pipirmahan pang kasunduan na dapat ay huwag itakip ang plakang ito sa original na registered plates ng isang behikulo. Pero may mga nakikita tayong paglabag bagamat hindi naman hinuhuli. Yan nga ang nakapagtataka, pards. May paglabag na sila sa batas-trapiko, bakit hindi sila hinuhuli? Dahil ba sa nakakabit na ‘special plates’? O dahil sa inaakala ng mga otoridad na malakas ang nagmamaneho ng sasakyan sa ahensiyang nakasulat sa plaka? Tsk tsk, malaking kalokohan ito, mga kabayan, di ba? Dapat, walang sisinuhin ang batas. Walang palakasan. Tanong pa: wala kayang mga ungas na namemeke ng mga plakang yan gaya ng 8 at etseterang matataas na numero? He he, sige nga kung talagang matapang kayo, pekehin ninyo ang plaka ng pangulo ng bansa na 1 (uno) kung anong mangyayari sa inyo pag nahuli kayo. Lalo pa kung si Pres. Duterte ang makakabuking sa inyo, goodbye Earth! Mga abusado sa lansangan, magbago na kayo!!! Adios mi amor, ciao, mabalos!