Ania itan, Kayong!

August 7, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Sakbay man pay kakailian Kayong Angkuan nga intay ituloy ti manglukais kadagiti nababara nga isyu ita ket rayray-awen tayo man pay ti bagbagitayo. Iti maysa nga aldaw, simmangpet ni Budoy a naggapu iti ayan dagiti barkadana ket dinamagna no ania’t masida da ken Toyang nga asawana.

Budoy: Toyang baket… ania’t masida?

Toyang: [adda iti medio adayo] Adda dita, agpilika.

Budoy: Ne, kasano nga agpiliak…ania ti pagpiliak ket maymaysa met a toyo ti nakaluban ditoy rabaw ti lamisaan ken di pay naluto.

Toyang: Agpilika no mangan ka wenno saan.

Budoy: Sal-ot!

Tayong: Ganabem saduttt!

Nalpas ti puli, daytan ah!

Timmapog tayo manen iti bulan ti Agosto Kakayong, ket iti sumaruno, adda tayo manen iti “Ber months a kunada. Ngem sakbay na, intay man kumustaen dagiti mannalon tayo kakayong mi. Kumusta dagiti naladaw a nagraep wenno nagtalon? Nangruna dagiti mangnamnamnama laeng iti todo? Kas kunada a kanayon dagiti mannalon a kakaduatayo, idawdawatda payen nga adda bagyona tapno adda met todona, sus maria kusina, kasanu daytan.

Iti napalabas, nadakamat tayo ti isyu iti kaawan bagas a pudno a kunada ket adda pay napasamak a panic buying iti bagas iti nagduduma a lugar kas ditoy ayanmi a paset ti lubong, adda dagiti nakipilpila ta makedngan ti magatang a bagas NFA…ta kunada nga amangan no agkamtud? Ngem segun kadagiti nakasarsarita tayo, nasikap latta ni Pinoy, uray kunam a lima kilo laeng ti magatang ti tungal makipila, ayabanna met amin a kameng ti pamilia, no limada koma lima met dagiti makipila kasanu ngay dayta…di kagudua kaban met la ti maalada. Awan latta, a lugi latta dagiti agmaymaysa a mapan makipila. Adda pay diay nakasarita tayo a mapanna pakipilaan amin a pilaan, sus maria kusina a talaga ni Pinoy aya.

Ngem ti saludsod, Kayong, ania kadi ti nagibasaranda iti impadpadamag da nga amangan no agkurang ti bagas? Amangan no adda manen rice hoarding a kunada, aramid manen dagiti dadduma a negosyante wenno pambarda laeng manen daytoy tapno ag-import ti gobierno iti bagas ket isu manen tay maibulsada? Saan aya nga adda idi kastoy a napasamak, nairamraman pay dagiti nangangato nga opisyal iti nasao nga anomalya. Kalpasanna, natakuatan nga adda bodega ti bagas a no sadino ket bimbimlad dagiti bagas ta di met malaklako.

Iti biang mi Kakayong, kitaen ketdi koma ti agdama a gobierno wenno administrasyon no kasano a mapatan-ay ti agrkultura ken ilongalongda koman ti makuna nga organiko wenno nakaisigudan a wagas ti panagtalon tapno natalged ti taraon a maidasar kadagiti lamisaan tayo.

Ta kasanu laengen ti biag tayo nangruna ni Pinoy ta kangrunaan a taraonna ti bagas. Uray sinako ti kuartam no awan met magatangmo a kanem, kasanu ngay, naimbag koma no ngipen ti kalding wenno baka ti ngipen tayo ta mabalin tayo lattan ti mapan agarab, diaske a biag, hahaha. Isu a kangrunaan koma nga ikkanda ti importansia ita ket ti panakapataud ti makunkunada a sustainable foods para iti tunggal Filipino.

Sus nalpas ti ani, anak ti tukling a balo, kasta pay kakayong ta ne overtime tayo manen ket sal-ot, ala, aglisi ka man dita Atong… ania man ta isensenyasmon. Anunsio iti hueteng? Agingga ita, dayta pay laeng ti ubram, ala, ala, kalagem ngarud tay dungrit a pangkis. Kasta pay…babayoo, tsup tsup muahmuah.