Anti-distracted driving law, maraming nalilito

Tone-toneladang tanong, upak, banat, iskrutiny ang bumunghalit sa sosyodad matapos naging batas ang  ADD Bill na naging batas – Republic Act 10913 o ang Anti Distracted Driving Law. Bakit naman? Ala eh, sandamukal daw ang mga isyu na dapat linawin bago ipatupad. Ang kaso, kabayan, eh ipinatupad na kamakailan (May 18, 2017). Pero sabi nila, oryentasyon pa lang daw ng  tatlong buwan at wala pang tiket at multa. Hmm, ganern? Baka naman mapasukan daw yan ng kotong! He he, sabi nga ng ilan baka di pa gawa ang batas, may mga nakapuwesto na sa Kotong Operations. He he, joke lang pero baka maging totoo. Ba’y mantakin mo ang multang mula sa limang libo hanggang trenta mil sa mga lalabag? Anak ng bakang bakla, mamabutihin na nga ng mga mahuhuli ng maglalagay ng libo kaysa sa magmumulta ng 5K sa first offense, 10K sa pangalawa at tataas pa hanggang kanselasyon ng lisensiya at baka may kulong pa. Sus ginoo! Ano ba ire? Pero teka, kaliskisan muna natin ang bagong batas na ito bago tayo tumalak.

******
Una sa lahat, hindi raw saklaw ng batas na ito ang lahat ng mamamayan kahit may cellphone ka pa. Bah, may makakalusot? Sino? Eh, di yung mga may cellphone na hindi umaalis ng bahay at nakikipagtsismis lang. Hmm tama ka pards. Pero sa mga nasa labas ng bahay, kuwidaw kasi ganito yun. Lahat ng mga motoristang gumagamit ng cellphone o anumang uri ng electronic entertainment at computing devices habang nagmamaneho ay ipinagbabawal ng batas na ito. Ibig sabihin, di ka pwedeng gumamit ng ano mang electronic device habang nagmamaneho dahil makakaapekto raw sa iyong konsentrasyon sa pagmamaneho. Simple lang, di ba? Aminado ang maraming nasa transport at mobile groups na tama ang batas dahil mahirap nga namang pagsabayin ang paghawak sa manibela at kung ano-ano pa riyang kakuwanan o kapritso. Lalo daw kung nakikipag-away ka sa kausap mo sa cellphone. Baka makabangga ka ng sampung buntis! Multiple homicide yan, pards.Kaya tama ang batas. Pero sa mga  iba pang kabawalan, uriratin natin.

******
Sakop ng batas ang mga may gulong na agricultural machineries, contruction equipment (buldozer, backhoe, pison etsetera pa), bisikleta, pedicabs, trolleys, habal-habal, kuliglig, wagons, motorsiklo, carriages at pati mga kariton na de tulak o de hila ng hayop na babagtas sa mga major at public thoroughfares (kalsada), highways o mga kalye. Oh, my native land of the morning! Nasa Pilipinas pa ba tayo? Alam ba ninyo na saklaw din ng batas na ire ang kabawalan sa pedestrians o mga naglalakad sa kalsada na huwag gumamit ng cellphone kapag tumatawid o nasa kalsada? Ganern? Oo, ganern. Iba na pag nag-iingat. Husme! Papaano kung may kausap ka sa cellphone at nasa kalsada ka? Aakyat ka pa sa punong Pine Tree at doon sagutin ang tawag o mag-text? E, kasi bawal sa kalsada, di ba? Maryunes! Dami na pala ang nadamay sa batas na ito, sabi ng marami. Parang lantarang pinakialaman na ang pribadong karapatan ng tao. Baka ang susunod, bawal na rin ang mag-cellphone sa loob ng C.R. baka makabulahaw sa mga umiire sa kabilang inodoro. Inang ko pong mahabagin. Natatakot na akong makakita ng kabayong hinuhuli dahil naka-head set. O hinuling kalabaw kasi ang hinete ay walang helmet! Mariakusina! Naku po, paki-linaw nga ang mga ginagawa ninyong batas bago mabuwang ang maraming kalahi. May part two pa ire, pards. Marami kasing problema, e. Sige, adios mi amor, ciao, mabalos na!

Amianan Balita Ngayon