Apo, pakawanennakami koma!

Opinion Sirmata ken Tagtagainep ni Mang Gusting

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga amammo. Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo. Kumusta kayo metten Kakayong?

Nalpasen ti Semana Santa kakailian, kakayong, mangrugi metten ti makuna a pudpudno a summer wenno kalgawen. Ngem ditoy batugmi a langit, kakayong, saan san a kalgaw ngem ketdi, pasaray agtodo metten. Nasapa a bisibis ti langit a kunada ta uray idi sakbay ti semana santa, nagtodtodon. Ngem kadagiti dadduma a paset ti pagilian kasta unay bara wenno dagaangna.

Apo, pakawannakami koma. Nagsasaruno kakayong ti panagdayyeg wenno ginggined a  napasaran iti nagsisina a paset ti pagilian.

Immuna iti Central Luzon. Narikna ti nasao a ginggined iti probinsia ti Pampanga ken Castillejos, Zambales. Ngem kakaruan ti na-damage ket iti ili a Porac ken Lubao.

Bayat a masur-surat daytoy a kolum tayo, segun iti damage, adda innem a kumpirmado a natay iti pannakarpuog ti maysa a supermarket.

Kasla mababalaw ti nakapsut nga istraktora wenno pannakaaramid ti uppat a kadasaaran a pasdek negosio. Ditoy a nariing manen ti kalidad dagiti mapatakder a pasdek.

Simmaruno a napasaran met ti Samar ti 6.5 a kapigsa ti ginggined ket nalaus a buteng dagiti umili. Idi met April 24, adda met napasamak a panagdayyeg idiay Mindanao.

Nupay nakapsot laeng ket ti danagen dagiti agturay, isu ti makunkuna ken mapadpadaaanan a BIG ONE a kunada a no sadino ket possible a mapasarakan ti kapigsaan a gingggined a mangdalapus iti entero a pagilian.

Apo, pakawanem dagiti basbasolmi. Daytoy a kita ti didigra ti pulos a dimo mapasungadan. Isu nga awan kasayaatan no di agannad. Ngem kasanu a makuna nga agannad ket ditoy laengen siudad ti Baguio kakayong, nalipatan manen dagiti tattao ti napasamak a 7.8 a kapigsa ti ginggined idi 1990.

Kasanu a nalipatan kunayo ngata? Padasen yo ti agdakiwas iti nagduduma a paset ti siudad. Agkakangato dagiti nagtubo a kasla uong a pasdek. Nagngangato. No ditay agriribu adda idi City Ordinance a no sadino ket manglimitar iti kangato dagiti pasdek. Ngem saan tayo a segurado no manu kadsaaran [storey] laeng ti mapalubosan.

Saan a bale no masegurado ti kinatibker koma dagitoy a pasdek ta di maipada kadagiti narba a pasdek idi 1990 Earthquake.

Adu a pasdek ditoy siudad ti Baguio ti narpuyog. Kas koma iti Hyatt Hotel, Skyword, Nevada Hotel, ti Hotel Amapola, ti dakkel a hotel iti Hilltop ken adda pay ditay nainagan.

Koma, nagbalin daydi a leksion kadatayo. Ngem saan ta nagtubo a kasla uong dagiti nagdadakkel a hotel ken pasdek negosio ditoy siudad.

Sadanto man la ngatan agbabawi no addan napasamak. Isu a no maminsan, datayo met laeng a tattao ti mangar-aramid iti pakadidigraan tayo.

Awan kas agannad, ngem uray kasanu nga annad no dumteng ti didigra wenno kalamidad kunayo ngata wen, kasanu a maladan dagitoy nangruna no natural calamity a kunada.

Ngem ditay kadi maaramiris a no maminsan ket panagsingir ti nakaparsuaan dayta? Kas koma no flashflood. Ammo tayo a ti kangrunaan a pakaigapuan dayta ket isu ti pannakakalbon dagiti bantay.

Napukawen dagiti kaykayo nga isu’t mangtengngel iti nabuslon a danum a patauden ti todo. No layos met nga uray iti mismo sentro ti siudad ti Baguio.

Kunatayo a bantay toy ayan tayon ngem aglayos pay laeng. Ania ti gapuna? Sus, aramid tayo met laeng no dadduma ta ditay ammo nga urnosen ti basura tayo.

Basura ditoy basura idiay. Ania kad ta di mapullatan wenno masullatan dagiti drainage system tayo.

Ania kay sa, isu nga Apo, pakawanennakami ta dikam ammo ti araramiden mi. Ala, Kakayong, kasta pay ta naimasan tayo manen. babayoooo, tsuptsup, muahmuah.