Apowww baranan ina!
Halo-halo kayo dita, sus ina aya, nagbaran ti tiempona sa ket agarbis ti malmalem. Daytan ti sagubanit a narigat a liklikan. Kunada a no agar-arbis nga agin-init, adu ti agtiwel nga aso ta malang-ab da ti singaw ti daga. Anian, mamatika met iti dayta, Kayong Angkuan. Kasta ti istorya kaniak daydi Apongko lakay Jorge ket adda idi naminsan a kasta ti mapaspasamak iti lugarmi, pagamuam addan agi-iriag iti saan unay nga adayo. “Agtiwel, agtiwel, aglemmeng kayo!” Sus, uray dakami nakipaglemlemmeng…immuli kami a dagus iti balay ket, idi kuan, addan nga agpayso agtiwel ngem saan met nga aso ta ni met gayam Inciong a warshock a kunkunami. Hahahaa, imbes a mabuteng kami agkakatawa kami ngem ti makadakes idi makitami ken makaasideg kadakami, adda met iggemna a talunasan. Ania pay, buatitin, ania pay la aramidem ngay.
Ayna, Kayong Angkuan aya, no kasano kabara ti panawen ken adun san ti agtiwel a kailian tayo gapu ti nakiwarkiwar pay laeng nga isyu, kasta met ti saan a maawatan a panniempona, ngem segun kadagiti managpaliiw, dakkel a talagan ti nagbaliwan ti panawen, Kayong. Ngem nupay kasta, bulan met ketdin ti Mayo, a…talaga a mangrugin ti matotodo isu a ditay maliklikan a pasaren ti panagbaliw ti paniempona. Kasla agsinnukat a kunada ngem, ti makunami, talaga ketdi a dakkelen ti nagbaliwan ti panawen ken paniempona ta bunga daytoyen ti ibabara ti law-ang ken climate change a makuna gapu iti global warming. Kanayon nga intay dakdakamaten daytoy kailian ta bareng laeng no nariing ti rikrikna dagiti kailiantayo a makabasa ta makipasetda iti pannakasaluad ti nakaparsuaan. Abusta, palpak este saan a nakalusot iti bicameral Commission on Appointment ti appointment ni Former Secretary Gina Lopez…Ta napintas ti ganuatna para iti pannakaisubli ti kinangayed ti nakaparsuaan babaen iti pannakapasardeng dagiti dadduma a pagminasan iti pagilian nangruna kadagiti nangdadael kadagiti kabambantayan ken kabakiran…
Sus, kayong Angkuan, apay ngata a kasta? Dagiti tattao a makita a nasayaat ken husto ti aramid da ket isuda met ti saan a maikkan iti gundaway nga agserbi. Ania ti makunam? Apay, adu kadi ti nadalapus iti pannakaipasardeng ti sumagmamano a pagminasan? Bommm, adu kadi ti naapektaran kadagiti makuna a senyores senyoras iti kongreso? Sus ina, agdamdamag kami laeng. Appowww a mangiturturong, dikay koma gumurgura ken masasair ta ipekpeksami laeng met ti rikriknaen ken kapanunotanmi ta sabali ti sirmata ken tagtagainep mi para iti pagiliantayo. Tay koma nagngayed a pagnaedan a presko nga angin ti inka lang-aben ken nangayed nga aglawlaw, tay koma addaka iti siruk ti narukbos a puon ti mangga wenno kaimito wenno ratilis ket adda indayon bayat ti inka panangtaraken iti nangaldawam. Sus ina aya, anian…wenno saan, madama ti panagitangadmo iti basi a natawenan ken adda naalseman wenno naperresan wenno nakarusan iti mangga a jumping salad…sus Kayong Angkuan, makapakatay met daytoyen hahaha.
Ala, Kayong Angkuan, ikit Juana, kasta laeng ti biag. Uray kasano ti ayat tayo a mangisubli iti sigud a kinangayed ti nakaparsuaan tapno napariir iti siruk ti mangga, no saan met a makitinnulong dagiti kailian tayo ken awan ti nasudi wenno natibker a plano ti gobierno para iti dayta. Awan seguron ta kas iti nadakamat tayo iti napalpalabas nga isyu ti ABN, damagmi idi a nagpamulada pay iti seedling ti kayo iti panawen ti kalgaw. Sus ina, adda ba utek yo? Appowww… ay, sorry, batu-bato sa langit pag natamaan, bukol este walang magagalit. Ngem ah, ah, dakesen. Umayen ta bukol este umayen ta binalsig lakay Gusting, kasano naimasam manen ti naki-tottot. Addaytan ni Sofing. Ala, Kayong, dakesen, addan ti kaputotan ni Gabriela. Inton maminsan manen, babayooo. Tsuptsup muahmuah.
Bato
May 7, 2017