Asusss, aniangay ti husto tay kunami

May 28, 2017 Opinion Sirmata ken Tagtagainep ni Mang Gusting

Yahooo, yahooo.com, hehehe. Naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Kumusta metten dita batbatugyo a langit, Kailian, Kayong Angkuan ken Ikit Juana, agtodtodo kadin dita batbatugyo. No dakami ti kas yo damagen, sus maria kusina, minalem ta todonan, ina. Ania ngay ngarud ket panawenennan a kunada. Saan ko laeng nga ammo kadagiti dadduma a disso a pakadandanunan toy ABN isyu tayo no nakaramanda metten iti makuna nga arbis ti Mayo.

Ala, Kailian nasken a nakasagana tayo a kanayon nangruna kadagitoy a panawen ti matotodo a makuna, ta kaaduanna met a dumteng dagiti didigra kadagitoy a panawen nangruna ti bagyo ken layos kas kada reggaay nangruna ditoy paset ti kabambantayan. Adu dagiti agreggaay gapu ta awanen ti buokna este kaykayona nga isu’t mangtengngel iti daga. Itay lang napan nga aldaw adda napasamak a yegyeg este ginggined ngem saan a man-made a ginggined, a. Sus, apowww, manglapayag ti isem ni pare Jun gapu iti imbagak hahahaa, naawatannan sa tay man-made a ginggined a kinunak. Ngem, kidding aside, wen kailian, 5.4 sa met itay ti nariknada a ginggined idiay paset na’t Zambales ket adda man dagitay kailian tayon a nabiktima. Dagitoy a didigra ti saan a mapakadaan no dumtengda. Saan a kas iti bagyo ta adda tay kunada a forecast ngem ti ginggined ti awan.

Kunada ngarud laging handa, kanayon a nakasagana kadagitoy a didigra. Don’t panic a kunada. Ngem be alert. Alla, kasanun no dagiti pakabuisitam ket naigagara wenno aramid ti tao? Kas koma kadagiti butaw-butaw wenno nalusso-lussok a kalsada a nagbayagda a matrabaho. Iti kallabes nakuna tayo a dagiti dadduma a madama a project ken a pavement wenno kalsada ket mabalin a raepan ta pitak metten. Kasta met kadagiti nabutaw-butawan ngem agingga ita awan met makitam nga agob-obra. No adda man tal-tallo wenno limlima, ay inayan a kunada. Isu daytan ti kunada a hay naku! No apay ketdi a di ma-praktis tay panagaramid iti kalsada a no nabukual, maisagana a dagus tay porma, mapison ket saronuen a dagus ta nakahalo a samento este semento. Ken, adda pay dagiti napaliiw mi, kasla nakurang ti curing period na ket amangan no di pay nabulanan ket agbetta-bettak…hay naku talaga. Sayang manen tay kuarta ni Pinoy ta di nausar iti husto a wagas.

Ala, tapno mabaliwan man met ti mabasa dagiti suki tayo ditoy ABN mangted tayo man met iti balakad kadagiti kakabsat tayo a makuna a duri ti pagilian wenno backbone a kunada. Ta no awan dagitoy a mannalon, ania ngay ti apoyen tayo? Daytoy ket panangbigbig tayo kadakuada ita bulan dagiti mannalon, ti adu a sakripisioda, ti saan a magatadan a pasetda iti panagbiagtayo. Koma, kailianmi ida a mannalon, rugyan tayo koma nga isubli ti makuna a nakayanakan a wagas ti panagtalon. Nupay narigat ken saan a bastabasta maisubli, rugyantayon. In-inutentayo nga isubli ti makuna nga organic farming ta no agtultuloy latta ti kabaruanan a wagas tayo a chemical farming, matayen ni Ina daga. Mamimpinsan a mapukaw ti dam-egna. No ina koma nga agpaspasuso, awanen makunnot tay tagibina ta naabbatanen, naangragen a kunada ket kastoy ti kasasaad ita dagiti makuna nga agricultural land tayo gapu iti awan sardayna nga intay panagaramat iti kemikal wenno wagas tayo nga agtalon a chemical farming. Opssss….ne, ay naliwayan tayo manen ti oras tayo a panagpalla-ilang ditoy sango ti tersinan ni Ikit Ansang. Ituloy tayo man laengen iti umay a lawasna ta kayat tayo man a ruk-atan dagiti madi nga itden ti chemical farming ken binipisio nga ipaay ti biological wenno organic farming.

Kasta pay Kayong Angkuan, babayo, tsuptsup muahmuah. Opsss, aglisi kan iti pagnaak, Atong…sabali man ta isensenyasmo ta agsapulka manen iti kalagem a numero. Ala, ala, kalagem man tay lalaki nga adda kukuatit na!