Babaeng boss ng sindikato, 3 pa nadakip sa Ilocos Sur

March 18, 2017 Provincial

LUNGSOD NG VIGAN, ILOCOS SUR – Hindi nakatakas mula sa otoridad ang isang babaeng leader ng sindikato ng droga at tatlo pang katao sa magkakahiwalay na operasyon sa Cabugao, Ilocos Sur.
Naaresto ng mga miyembro ng Philippine Drug Enforcement Agency at kapulisan ng Ilocos Sur si Cherry Ann Lozano, leader ng isang drug syndicate na diumano ay nagsusuplay ng shabu sa Cabugao at kalapit na bayan sa Ilocos Sur.
Nabitag sa planadong sting operation noong Marso 11 ang babaeng pusher na nagbebenta ng anim na sachet ng shabu at inihatid pa ito sa barangay Pug-os, Cabugao.
Nakumpiska rin ng otoridad ang motorsiklo na ginamit sa paghahatid ng shabu at ang cellphone na ginamit sa ilegal na transaksyon.
Sa ilalim ng Section 5 ng Republic Act 9165, ang pagbebenta ng ilegal na droga ay hindi maaaring piyansahan.
Sa parehong bayan, sa barangay Daclapan, ang 28-anyos na nasa drug watchlist na si Manman Olivar ay nadakip din matapos ni-raid ng otoridad ang kanyang tahanan kung saan nakuha ang dalawang sachet ng shabu at mga drug paraphernalia.
Ayon kay Bismark Bengwayan, spokesperson ng PDEA-Region1, ang naturang raid ay iniutos ng lokal na korte.
Samantala, noong Marso 9, ang magkasunod na raid sa dalawang bahay ng 38-anyos na si Antonio R. Ramolete alyas “Tony” ay nagresulta sa pagkakumpiska ng shabu, mga baril, at drug paraphernalia.
Ang anti-narcotics agents na inutusan ng RTC Branch 20 sa Vigan City ay nakakita ng tatlong sachets ng shabu, a isang homemade caliber 22 rifle, nagamit na bullet casings, at drug paraphernalia sa bahay ni Ramolete sa barangay Sulbec, Santa Catalina.
Mula naman sa kanyang bahay sa barangay Poblacion, sa parehong bayan ay may nadiskubreng 45 caliber pistol, isang Armscor handgun, isang 12-gauge shotgun na may mga bala, apat ma magazine ng 45 pistol, iba pang mga bala at drug paraphernalia.
Kakaharapin ni Ramolete ang kaso sa drugs violation at gun control violation.
Samantala, noong Marso 12 ng umaga sa barangay Sacaang, Galimuyod, sa Ilocos Sur, ay nakumpiska ang apat na sachet ng shabu, drug paraphernalia, isang 45 caliber pistol na may magazine at bala mula sa bahay ni Apollon G. Gadingan.
Ngunit si Gadingan ay nakatakas sa otoridad.
“The confiscation of these various weapons only proves that these criminals are dangerous. When they are high on drugs, they are capable of doing anything,” babala ni PDEA Region1 Director Jeoffrey Tacio. Ace Alegre / ABN