Bagas latta, Kayong!

August 15, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna.

Sakbay man pay kakailian Kayong Angkuan nga intay ituloy ti manglukais kadagiti nababara nga isyu ita ket rayray-awen tayo man pay ti bagbagitayo. Iti naminsan, nagsarak da Budoy ken Andong a kumparena, impangpangas ni Budoy ti kinadungngo ni baketna…

Budoy: Ammom, pare Andong, love nak la unay ni baketko.

Andong: Pagkunaam met pare Budoy?

Budoy: Wen, a, pare…ta manun a tawen nga agdendennakami, ita laeng a rinigaluannak sika.

Andon: Oww, nagganasen pare… ania ngay ti inregalona?

Budoy: Kua pare, adda nakitak a sapatos ken T-shirt iti siruk ti kama mi, sinorpresanak.

Andong: Patay kang bata ka!

Nalpas ti puli, anak ti tukling a balo! Saan ngata a nabati ni kumparem? Wahahahahahah.

Iti nalikud a kolum tayo, napagpapatangan tayo ti kunada a panagkamtud iti NFA rice kailian. Ket iti nabiit, simmangpet ti kinabkaban a bakas. Awan ngarud ti makuna a panagparikut iti panagkurangna. Napintas a damag dayta ngem, iti sabali a bangir, segun iti damag… tangay de kalidad a bagas manipud sabali a pagilian, nangin-nginan ta diay sigud sa a 27 pesos ket nagbalinen a 32 pesos. Ania’t makunayo kabarangayan, kailian, dakayo kakayong ken iikit?

No dakami ti inkay damagen ti kapanunotanna, awan makunami no di ket agyaman tayo ta addan mayapoy tayo ta dimo met maisaang ta 32 pesos mo, saan ketdin? Ngem iti ayanna nga adat kayong Angkuan aya, pudno ngata nga agkurang ti bagas ditoy pagilian? Idinto ta nagadu wenno nawadwad met ti apit dagiti manalon tayo? Ania kadi a talaga ti parikut? Wenno—adda man nasabengen a naibudi iti dayta?

Maysa a pagdanagan mi kakayong, amangan no sumro wenno agari manen ti kina-suitik ken kinagamrud dagiti dadduma dita ket gapu ta napintas a kalidad a bagas dayta NFA ken mailaok manen kadagiti commercial a bagas a kas iti napaspasamak idi napalabas. Ammoyotayo met ah, saan met nga amin a tao ket awan ammona…adda idi naipadpadamag a malalaokan iti NFA diay commercial a bagas, akin aramid iti dayta? Sus maria kusina kayo, maitugot yo aya ti sanikua wenno kinabaknang yo inton makurusan iti apog dagita dapanyo? Mangibati kayo ketdi iti pagaapan dagiti mapanawan yo, a. Awan to ti mayat a basbassit ti bingayna kadagiti maibatim a sanikua kadakuada, nalpas ti puli…adu ti kakasta, pagriririanda ti tawidenda nangruna no saan a nasayaat ti panangbingay ni Ama kadagita a sanikua.

Isu nga awan kasayaatan nga intay aramiden, agbiag a sidadalus, manganka la ketdi a kunada iti maminlima iti agmalem, mapnek kan…dagitinto pay daddduma ket marigatan a mangan iti mamitlo, no maminlimakan, mayataen. Sus apay a maminlima? Wen ta karaman ditan diay maminduaka nga agmerienda.

Ti maibati mi kailian, daytoy koma ti pagpampanunotantayo nangruna kadakayo a naayat a mangbasbasa iti ABN ken toy nanumo a kolum tayo… “Agurnong ka iti kinabaknangmo idiay langit, ta no sadino ti ayan ti kinabaknangmo adda sadiay ti kararuam.”

Sus nalpas ti ani, anak ti tukling a balo, kasta pay kakayong ta ne, overtime tayo manen ket… aglisi ka man dita Atong, ania man ta isensenyasmon? Anunsio iti hueteng? Ala, ala…kalagem ngarud tay pangkis nga opisyal. Kasta pay babayoo, tsup tsup muahmuah