Baguio-Benguet, talo sa bidding sa 2018 Palaro

September 30, 2017 Headlines

LUNGSOD NG BAGUIO – Tila isang bula na naglaho sa kamay ang inaasam ng lungsod ng Baguio at probinsya ng Benguet na makuha ang pagiging host ng 2018 Palarong Pambansa na nanatili na lamang isang pangarap sa ngayon.
Ito ay matapos na ang Palarong Pambansa Technical Evaluation Committee na pinangungunahan ni Department of Education (DepEd) Secretary Leonor Briones ay mas pinili ang Vigan City sa Ilocos Sur na pagdausan ng Palarong Pambansa.
Tinatayang mahigit 12,000 na estudyante sa elementarya at sekondarya mula sa 18 rehiyon ng bansa ang magpapaligsahan sa palakasan sa susunod na taon.
Ang iba pang naki-bidding ay ang mga lokal na gobyerno ng Bulacan, Marikina at Isabela.
Ang Palarong Pambansa, na pinakamalaki at prestihiyosong pampalakasan sa Pilipinas, ay hindi pa kailanman naidaos sa rehiyon ng Cordillera.
Personal na nagtungo sina Mayor Mauricio Domogan, Governor Cresencio Pacalso, La Trinidad Mayor Romeo Salda at iba pang lokal na opisyal, na kinabibilangan ng mga kinatawan ng DepEd-Cordillera, sa Maynila upang patibayin ang tsansa na mapili ang Baguio-Benguet sa bidding.
Sinabi ni DepEd regional information officer Georaloy Palao-ay na si Domogan ang tumayo at nagbigay ng presentasyon ng “Coolest Palaro” sa harap ng selection board. Itinampok nito ang magandang klima ng Baguio-Benguet, sapat na akomodasyon at sports facilities, tourist sites, at ang estado ng kaayusan at kapayapaan.
Ani Palao-ay, nakuha ng Baguio at Benguet ang pinakamataas na puntos sa akomodasyon at sports facilities, ayon sa inspection team na nauna nang bumisita upang suriin ang mga pasilidad dito. Sinamahan ang mga ito ng lokal na sports officials sa pangunguna ni city sports coordinator Gaudencio Gonzales.
Sa kabila ng naging resulta ng bidding, tinanggap ng tatlong namumuno sa Baguio-Benguet ang naging desisyon ng Palaro board at sinabi nilang sasali muli sa bidding sa hinaharap.
Nagpasalamat din sila sa lahat ng sumuporta sa “Coolest Palaro” na kinabibilangan ng mga pribado at pampublikong institusyon, kapulisan, media, mga ahensya ng gobyerno, volunteers, utility companies, at marami pang iba. GABY KEITH / ABN