Baguio City night market, palalawakin

Inaprubahan ng Baguio City Market Authority (BCMA) ang proposal na paglalagay ng extension ng night market area na ngayon ay sasakupin na ang parking spaces sa Perfecto Street upang may mapaglagyan ang mga walk-in vendors gabi-gabi.
Nais ng pamahalaang lungsod na ayusin ang naturang lugar na maging komportable at ligtas para sa mga nagtitinda at publiko dahil sa nakukuhang atensyon ng night market mula sa mga residente at mga turista.
Tinatayang nasa 160 vendors ang maaaring magtinda sa extension area, ayon sa inisyal na pagsusuri ng City Engineering Office.
Sa kasalukuyan, may nagtitindang 1,068 vendors gabi-gabi sa night market sa Harrison Road. Sa naturang bilang, 960 ang nagtitinda ng dry goods at 60 naman ang food vendors habang 48 ang roving sellers.
Maglalagay rin ng mas maayos na ilaw sa extension upang makita ng mga bumibili ang mga paninda.
Para sa paglalagay ng ilaw sa extension ay kakailanganin ng lungsod ang hindi bababa sa P264,000.
Sinabi ni City Engineer Elpidio Garabiles kay Mayor Mauricio G. Domogan na sa mungkahing paglalagay ng ilaw sa Perfecto Street ay kasali na ang supply ng Light Emitting diode (LED) na siyang gagamitin upang makatipid sa kuryente para sa mga ilaw ng extension.
Sa utos ng BCMA ay ipinasa rin ni Garabiles ang inihandang cost estimate at timetable ng proyekto kay City Treasurer Alex Cabarrubias para mapaglaanan ito ng pondo.
Sisimulan ng BCMA ang screening ng mga kwalipikadong aplikante na nais magtinda sa extension kapag natapos na ng city engineering office ang pagsusukat sa mga stalls at paglalagay ng mga ilaw.
Ang night market extension ay gagamitin lamang para sa dry goods upang mapanatili ang kalinisan ng lugar kapag umaalis na ang mga vendor sa kanilang mga pwesto tuwing madaling araw.
Iminungkahi ni Garabiles na ang pondo na gagamitin sa extension ay maaaring kunin mula sa trust fund ng night market operation upang agad na makompleto ang proyekto.
Sinabi ng BCMA na ang pag-apruba sa extension ng night market sa Perfecto Street ay makakatulong upang mapaluwag ang 500 metrong kahabaan ng Harrison Road kung saan nagsisiksikan ang mga nagtitinda at bumibili at maiwasan ang mga insidente ng petty crimes gaya ng pandurukot, dahil sa itinuturing na maluwag na seguridad sa operasyon ng night market.
Itinalaga rin ang mga pulis at mga barangay tanod na kasama ng Public Order and Safety Division (POSD) para sa seguridad ng lugar.
Ang night market ay nagsisimula kada ika-9 ng gabi hanggang sa ika-2 ng madaling araw. Nagbibigay ito ng average na P1.5 milyon na buwanang kita ng lungsod na kinukuha mula sa P50 kada gabi na binabayaran ng bawat night market vendor. May ulat sina LIZA AGOOT at DEXTER SEE / ABN

Amianan Balita Ngayon