Baguio handa sa tagtuyot

April 8, 2017 Headlines

Suplay ng tubig, tipirin – BWD

LUNGSOD NG BAGUIO – Sa opisyal na pagdedeklara ng pagsisimula ng tagtuyot mula sa Philippine Atmospheric Geophysical and Astronomical Services Administration (Pagasa) noong ika-5 ng Abril ay nagpahayag ng kahandaan ang iba’t ibang ahensya ng gobyerno sa lungsod.
Babala ng Pagasa na magpapatuloy ang pagtaas ng temperatura sa tinaguriang summer capital ng Pilipinas bagaman sa kasalukuyan ay nakakaranas ng biglang paglamig ng temperatura pagsapit ng gabi at madaling araw.
Ayon kay Wilson Lucando ng Pagasa-Baguio, ito ay dahil hindi pa ganap na nawawala ang North East Monsoon na namumuo at nagmumula pa sa malalamig na lugar tulad ng Siberia, Mongolia, at Hilagang China.
Aniya, mayroon pa ring posibilidad na pumasok ang isang bagyo sa bansa kahit na tag-init.
Naitala noong ika-14 ng Marso ang tinatayang pinakamainit na temperatura ngayong taon na umabot sa 27.6 degrees Celsius, samantalang 25.6 degrees Celsius naman ang tinatayang pinakamainit ngayong Abril na naitala noong ika-6. Inaasahang maglalaro sa 14 degrees Celsius hanggang 25 degrees Celsius ang temperatura sa mga susunod na araw.
Kaugnay nito ay puspusan ang naging paghahanda ng Baguio Water District (BWD) sa inaasahang pagbaba ng suplay ng tubig dahil sa tagtuyot. Nagsagawa ng mga hakbang ang BWD upang mapagaan ang panahon ng tag-init at matugunan ang pangangailangan ng bawat konsyumer ng tubig sa Baguio City.
Ayon kay BWD public information officer Mark Pasagoy, parte ng kanilang taunang contingency plan ay ang pagkontrol ng suplay ng tubig.
Aniya, sa pangahong ito ng taon umaasa ang BWD sa mga water reserves tulad ng Mount Sto Tomas rain basin upang matugunan ang pangangailangan ng syudad sa tubig.
Inaantabayanan din ng BWD ang pagdating ng malaking bilang ng turista ngayong tag-araw, kaya naman binabalanse nila ang pagsusuplay ng tubig.
Tinitignan din ng BWD ang Bulk Water Supply Project (BWSP) na maaring maging pangmatagalan na solusyon sa kakulangan ng suplay ng tubig.
Sa ngayon, hinihintay ng BWD ang resulta sa ginagawang pag-aaral ng Maynilad, Ayala-led Manila Water Company, at Prime Water Infrastructure Corporation patungkol sa BWSP.
Kapag naisakatuparan ang nasabing proyekto, makakapagsuplay ng 52,000 cubic meters sa isang araw at maaari pa itong tumaas ng 4,000 hanggang 5,000 cubic meters sa isang araw sa panahon ng tagtuyot.
Hinimok ng BWD ang publiko na magtipid ng tubig upang maiwasan ang kakulangan nito. Maaaring makatipid ng tubig sa pamamagitan ng pag-aalaga sa kagubatan, lalo na ang mga water reserves. Pati ang simpleng paggamit ng baso sa tuwing magsisipilyo ay maaaring makatulong sa pagtitipid ng tubig. Iminungkahi rin ng BWD ang water harvesting tuwing umuulan. Maaring gamitin and nalikom na tubig ulan sa pagdilig ng mga halaman at iba pa.
Binigyang-diin ng BWD na isa sa pinakaimportanteng hakbang upang makatipid ng tubig ay ang pagsiyasat na walang tagas ang mga linya ng tubig ang mga kani-kaniyang kabahayan pati na rin sa mga kalsada. Celina Cleofe O. Padernal at Rozienna Rosales / UC Interns / ABN