Baguio humakot ng ginto sa CARAA 2017

February 11, 2017 Headlines

LUNGSOD NG BAGUIO – Muling humakot ng gintong medalya ang mga atleta ng lungsod matapos na itanghal bilang overall champion ang Baguio City sa katatapos na Cordillera Administrative Region Athletic Association (CARAA) Meet 2017.
Sa kanyang Ugnayan noong Pebrero 8 ay ipinagmamalaking ibinalita ni Mayor Mauricio Domogan na ang mga delegado ng Baguio ang magiging kinatawan ng rehiyong Cordillera na makikipagtagisan sa Palarong Pambansa.
Nagwagi sa Elementary Division ang Baguio sa 85 gold, 45 silver at 21 bronze na medalya. Pumangalawa naman ang Benguet na may 18 gold, 34 silver at 28 bronze medals. Pumangatlo ang Apayao sa 11 gold, 12 silver at 20 bronze. Pang-apat ang Abra, panglima ang Kalinga (Tabuk City), pang-anim ang Mt. Province at panghuli ang Ifugao.
Sa Secondary Division ay nanguna pa rin ang Baguio na may 147 gold, 67 silver at 38 bronze medals. Nanatili sa pangalawang pwesto ang Benguet na may 15 gold, 44 silver, at 55 bronze. Umangat naman ang Mt. Province sa ikatlong pwesto sa 11 gold, 15 silver at 38 bronze. Pang-apat ang Kalinga (Tabuk City), panglima ang Apayao, pang-anim ang Ifugao at ang panghuli ay Abra.
Sa overall medal tally, ang Baguio ay may 232 gold, 112 silver, 59 bronze. Ang Benguet ay may 33 gold, 78 silver, 83 bronze; sa Mt. Province ay 18 gold, 20 silver, 62 bronze; Kalinga (Tabuk City) ay 16 gold, 37 silver, 36 bronze; Apayao, 16 gold, 33 silver, 61 bronze; Ifugao, 10 gold, 36 silver, 72 bronze; at Abra, 10 gold, 19 silver, 32 bronze.
Tumaas sa 20 gold ang nakuha ng Baguio City ngayong 2017 kumpara noong nakaraang taon.
Samantala, nagkaroon ng special awards at makakatanggap ng tig-P10,000 cash ang Baguio Central School para sa Most Clean School, Kalinga (City of Tabuk) para sa Most Delegation at ang Cleanest and Greenest Delegation ay ang Mt. Province.
Ayon kay Domogan, naging maayos ang pagdaraos ng CARAA 2017 kabilang na ang facilities na nagamit at peace and order.
Aniya, maaari nang kunin ng mga nanalong atleta ang kanilang mga insentibo sa Accounting Division ng lungsod. Nakahanda na rin ang pondo para sa transportasyon, pagkain at allowance ng delegado ng Baguio para sa Palarong Pambansa.
“They will earn honor not only for themselves but also for the city of Baguio and the entire Cordillera Administrative Region,” aniya. Jessalyn M. Soreno, UB Intern / ABN