Bagulin, maysan a drug-free, drug-unaffected municipality

July 23, 2017 Headlines

BAGULIN, LA UNION –  Inpannakkel dagiti umili  ti Bagulin, La Union iti tagline-da nga “Awan Danag Bagulin” kalpasan a maideklara ti ilida kas “drug-free and drug-unaffected municipality” iti Philippine Drug Enforcement Agency (PDEA)-Region I idi Hulio 17, 2017.
Nagun-od ti ili ti nasao a pammigbig kalpasan a pinasingkedan ti PDEA-Region I, Department of the Interior and Local Government (DILG)-Region I, Department of Health (DOH)-Region I, Police Regional Office I (PRO I), Probinsial a Gobierno ti La Union (PGLU), ken Opisina iti Deputado iti maika-dua a distrito ti La Union, iti Municipal Anti-Drug Abuse Council (MADAC) Resolution No. 1 Series of 2017.  
Pinaneknekan ti nasao a resolusion nga awan ti illegal a droga agraman dagiti pasilidad ken bumarangay a konektado iti droga ken panagtungpal dagiti umili kadagiti reketitos ti RA 9165 wenno Dangerous Drugs Act ken Dangerous Drugs Board (DDB).
Inbitlani Atty. Marvin O. Tavares, assistant regional director ti PDEA-I, iti nasao a deklarasion a mangpampaneknek iti nabalaigi a panagisayangkat kadagiti programa kontra iti illegal a droga ti Bagulin. Datoy ket naggubbuay iti kinaawan iti personalidad wenno bunggoy nga agus-usar wenno aglalako, agar-aramid, agmulmula iti illegal a droga.  Insingked pay iti nasao a deklarasion nga awan iti taga-Bagulin a mangsalsalaknib kadagiti komprometibo iti illegal a droga.
Kinuna ni PSInsp Christopher I. Nisperos, hepe iti Bagulin-Philippine National Police (PNP), a nakatulong dagiti gunay iti PNP iti pannakagun-od iti nasao a pammigbig.  Dagitoy ket pakaibilangan iti check points, house visitations ken pammagbaga kadagiti madi nga epekto iti droga.
Siraragsak a kinablaawan ni Gobernador Francisco Emmanuel “Pacoy” R. Ortega III dagiti umili ti Bagulin aglalo kadagiti mangidadaulo iti MADAC nga idadauloanda Mayor Ferdinand D. Tumbaga ken dagiti kameng iti Sangguniang Bayan a pangpanguloan ni Bise Mayor Joel E. Nang-is. Kinablaawanna pay dagiti bumarangay a nakimaysa kadagiti agdadaulo iti ili tapnu agbalaigi ti Bagulin kontra droga.
Nagyaman met ni Gob. Pacoy kenni Cong. Sandra Y. Eriguel ti maikadua a distrito ti La Union; iti PDEA nga inbagi ni Attorney Tavares; DILG nga inbagi ni Dir. Paulino Lalata iti DILG-La Union; DOH ken Philippine National Police nga inbagida PCSupt Charlo C. Collado ken La Union Police Provincial Director Leo M. Francisco, iti agtultuloyda a suporta iti La Union tapnu masolbar iti problema iti ilegal a droga.
Bininsa-binsana pay dagiti gannuat iti PGLU tapnu mapabileg iti laban dagiti nasao nga ahensia iti gobierno kontra droga.
Inawisni Mayor Tumbaga dagiti kailianna nga ituloyda iti panagkaykaysada tapnu agtaginayon iti dayaw ti Bagulin kas drug-free ken drug-unaffected municipality.
Kinunana pay a kasapulan a siputanda dagiti anyaman a gunay iti droga iti barangayda ta dakkel a dayaw dagiti umili iti nasao a pammigbig.Ti Bagulin iti maikadua nga ili a naideklara kas drug-free and drug-unaffected municipality kalpasan a mapaayan met ti ili ti Burgos, La Union iti nasao a pammigbig iti nasapsapa a petsa. Israel O. Rudio, Information & Communication Officer IV, PGLU / ABN