Bakbakan sa Marawi, matatapos kaya?

June 4, 2017 Daplis Walang Mintis Opinion

Habang sinusulat ang espasyong ito, patuloy pa rin ang bakbakan sa Marawi City. Natural, patuloy din ang pagdami ng mga namamatay at nasusugatan. Kasama ring dumarami ang mga taong naiipit sa bakbakan. Di nila malaman kung saan kukubli at kung saan din kukuha ng makakain. Marami at darami pa ang problemang darating habang ang usok sa bakbakang yan ay di pa humuhupa. Kung sa puwersa ang usapan, tiyak di matitinag ang puwersa ng gobyerno dahil talagang mas malayong marami kumpara sa kakarampot na bilang ng kalaban. Pero bakit di natitinag ang kalabang Maute? Bakit tinatawag ngayon na Maute-ISIS? Ano ba ang tunay na kartada o kalagayan sa Marawi? Hanggang diyan na lamang kaya ito o tama ang pangambang baka kumalat pa ito? Sige, himay-himayin natin ire, hane?

******
Ang Maute ay nagmula lamang sa isang maliit na pamilya. Kung papano lumaki, saksi ang mga naging biktima nila at ang ating gobyerno. Kung may pagkukulang ang ating otoridad at lokal na pamahalaan, saksi rin ang nakalipas na panahon. Siguro, sa puntong ito, di na dapat ang sisihan. Nandiyan na sa labanan ang puwersang minaliit ngunit may ibubuga pala. Aba’y mantakin mong sa liit ng grupo nila (daw) ay nakapatay na sila ng mahigit sa dalawampung sundalo, tatlong pulis na may anim pang missing in action at maraming sibilyan. Kung kakarampot daw sila, ayon sa mga analyst, bakit umabot na sa mahigit sa isang daang Maute ang napapatay? At meron pang walo diumanong napatay na mga teroristang dayuhan. At di lang yan, may mga ulat pa na higit pa raw sa apatnapu ang mga dayuhang kasama sa mga Maute na tinutugis. Husme! Aba’y tama yata ang katawagang – Maute-ISIS sa grupong ito, di ba?

******
Habang sinusulat ang espasyong ito, nakasampung araw na ang bakbakan. Maraming tanong ang sumulpot: bakit hindi nauubusan ng bala ang kalaban? Hindi rin sila nauubusan ng pagkain at inumin? Bakit kayang sumabay ang kanilang armas o kagamitan sa gamit ng military at PNP? Ibig bang sabihin na matagal na nilang naplano ang eksena ngayon? Ibig kayang sabihin na totoo ang mga ulat na diumano ay pagsubok sa kanila ito upang pumasa sila sa timbangan ng ISIS upang mapabilang na sila dito? Kasi kung may galing pa sa ibang bansa bilang dagdag puwersa (o galing sa labas ng Marawi), papaano ito o sila nakakapasok sa war-zone? Kung totoong sila’y gumagamit ng snipers, di ba nasa alanganing posisyon ang mga tumutugis na sundalo at pulis? Wala na itong pinag-iba sa pelikula, di ba? Tuloy, sabi ng ilang maalam sa estilo ng bakbakan: upakan na nang upakan ng bomba sa lahat ng mga tukoy na kinaroroonan ng mga kalaban. E, papaano ang mga sibilyan?

******
Kamakailan lang, umupak ulit ang bombers ng air force. Anong nangyari? Mahigit sa sampung sundalo ang patay at marami rin ang sugatan kasi sumablay ang birada ng fighter plane ng gobyerno. Iniimbestigahan na ang nangyari. Tiyak, magkakaroon na naman ng sisihan at baka sibakan. Di ba katawa-tawa sa panig ng mga kalaban ang nangyari? Sarili mong puwersa ang iyong binibira at pinapatay sa halip na mga kalaban. Sa kabuuan naman ng Marawi City lalo na sa sentro nito, mistulang dinaanan ng World War 2. Lasuglasug ang mga kabahayan. Wala ng mababalikan ang mga residenteng nagsilikas. May pananagutan ba ang estado dito o bahala na ang taumbayan na magpasensiya at humingi ng awa? Yan ang larawan ngayon ng Marawi. Di lang parang basag na salamin kundi durog-durog pa. Kung kailan magwawakas ang trahedya ng bakbakan, Diyos na lamang nakakaalam. Abangan ang mga susunod pang kaganapan. Adios mi amor, ciao, mabalos!