Balay taripato mabangon iti maikadua a distrito iti Ilocos Sur

September 3, 2017 Provincial

VIGAN CITY – Tapno adda makaanay a pagyanan dagiti babbaket ken lallakay nga awanan mangtaraken ken napanglaw, maipatakder ti Balay Taripato iti maikadua a distrito ti Ilocos Sur iti sakup ti Santa Lucia District Hospital iti ili ti Santa Lucia.
Daytoy ti impakaammo ni Bokal Gina Pe Benito-Cordero kabayatan ti pannakiuman dagiti kameng ti lokal a media kenkuana.
Narugian nga insigida ti panakaipatakder ti pasdek idi Agosto kalpasan iti naaramid a ground-breaking ceremony nga indaulluan ni Cordero.
Manamnama a malpas ti konstraksion iti uneg ti tallo a bulan ken naituding a maluktan inton Enero 2018.
Agdagup ti 26 a katao ti laonen ti baro a Balay Taripato wenno 12 a lallakay ken 14 a babbaket.
Kinuna ni Cordero a dagiti taga-maikadua a distrito a lallakay ken babbaket nga adda iti Balay Taripato iti Magsingal ket maiyalisdanto iti baro a pasdek tapno as-asideg a pangbisitaan dagiti kakabagianda.
Kalpasan a maluktan ti baro a Balay Taripato, kinunana nga agkasapulan ti probinsia ti caregivers ken kabarbaro a nars a mangserbi kadagiti pasiente.
Ti Balay Taripato iti Santa Lucia ket maikatlo a maipatakder iti Ilocos Sur.
Immuna a naipatakder ti Balay Taripato iti Magsingal District Hospital, Magsingal, Ilocos Sur idi 2006 babaen ti programa ti gobierno ti probinsia nga indaulluan idi ni Gobernador Deogracias Victor “DV” Savellano.
Simmaruno a nabangon ti maikadua a Balay Taripato iti sigud nga Azcueta Clinic ili ti Cabugao.
Kangrunaan a panggep ti Balay Taripato ti mangipaay ti tulong ken nam-ay kadagiti nataengan a lallakay ken babbaket iti probinsia nga awanan ti mangtartaraken. ICR/PIA-Ilocos Sur / ABN