Bandalismo ng mga kabataan, tignan ang mas malalim na dahilan

January 11, 2019 Balitaktakan sa Amianan

Mukhang nahihirapan pa rin ang lokal na gobyerno ng Baguio sa kampanya laban sa illegal graffiti at vandalism lalo na sa mga barangay, patunay ang walang-takot na pag-spray ng mga pintura ng ilang kabataan sa ilang sasakyan sa Barangay Brookside at mga karatig barangay kamakailan lamang. Ginawa ng mga batang ito ang pag-vandal sa madaling araw kung saan tulog na tulog ang mga residente. Ang nakakalungkot pang katotohanan ay mga bata, mga menor de edad ang mga sangkot na kung tutuusin ay dapat nasa mga bahay lamang ang mga ito na natutulog at nagpapahinga sa ganoong mga oras.
Sa kabila ng pinaigting na kampanya ng pamahalaang lungsod laban sa graffiti at vandalism sa Baguio ay tila nalulusutan pa rin sila. Katunayan, sa nakaraan ay binigyan ng awtoridad ni Mayor Domogan ang mga Punong Barangay at mga miyembro ng barangay council na protektahan ang kanilang sariling nasasakupan laban sa bandalismo sa pamamagitan ng kaniyang Administrative Order No. 020 na naka-angkla sa city ordinance no. 41, series of 2008 o ang Anti-Graffiti Code of the City of Baguio.
Nagkaroon din ng mga lectures at trainings sa mga volunteers mula sa mga barangay upang lalong makatulong sila sa kampanya laban sa graffiti vandalism. Nakakalungkot pa rin na isipin na mayroon ngang CCTV sa barangay at nakunan “in real time” ang mga ginawa ng mga bata na maaari sanang nasawata na sila sa pagkakataon ding yun kung may mga opisyal ng barangay na nakatao sa mga CCTV.
Maraming katanungan kung bakit ginagawa ng mga kabataan ang bandalismo, may mga dahilan, may mga pinagmumulan kung bakit nasasangkot ang mga kabataan dito. Ang mga batang sangkot ba ay nag-aaral? Baka may mga probema sila sa kanilang mga pamilya? O baka naman nababarkada sila sa masasamang tao at kabilang na sa mga gang o fraternity? Bakit sila nakakakuha o nakakabili ng mga spray paint na dapat ay may regulasyon ng gobyerno?
Hindi natin lubos na masisisi ang gobyerno sa paglala ng bandalismo, ang kampanya laban dito ay laban at dapat pagtulungan ng lahat – gobyerno, barangay, pamilya, mga pribadong grupo, simbahan, paaralan at buong komunidad. Dahil kapag hindi ito natugunan nang maayos at maagapan ay hindi lamang perwisyo sa mga may-ari ng sasakyan, mga may-ari ng mga bahay, at magiging pangit ang imahe ng lungsod kundi masisira ang buhay at kinabukasan ng mga kabataang nasasangkot sa mga gawaing ito. Hindi sapat ang multang P1,000 hanggang P5,000 o pagkakulong bagkus ay dapat pagtuunan ng pansin ang kabuuang kalagayan at kapakanan ng mga kabataan.