Barangay Election, Kayong

April 14, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada. Nagtagtagainep ni Mang Gusting ket kampay idi, nagsarakda ken Atong iti tersina ni Ikit Huana ket adda naistorya ni Atong a nakakigtotan ni Mang Gusting—ket

Atong: Ammoyo, Mang Gusting, tunggal agapa kami ken Atang a baketko, agbalin a historyador.

Gusting: Kasano dayta, Atong?

Atong: Ibandona ti napalabas ko ken malagipna uray sangkabassitan a biddutko.

Gusting: Unay met ni Atangen, Atong…

Atong: Ken, saan laeng a dayta, Mang Gusting, adda pay maysa ken dayta ti likliklikak nga ibandona nangruna ditoy lugartayo.

Gusting: Aya!

Atong: Isu a tunggal adda paaramidna wenno kiddawenna, tungpalek lattan.

Gusting: Unayen ngay. ania ngamin dayta?

Atong: (arasaas) Amangan no ibandona a maysaak pay laeng a supot!

Wahahahaahhahaa.

Bueno kakayong, kailian, agkatawa dagiti mayat, ah. Opsss, dikay agmurareg ah, dakes ti kanayon a nakasiddunget. Kunada ngarud, laughter is the best medicine isu nga agkatawa wenno umisem kayo nga uray agsasamusam dagiti intay paspasaren a parikut.

Kayong Angkuan, nakapagpilakan iti kanidaturam? Ania, kagawad wenno kupitan este kapitan? Kakayong mi ida, iti damo nga aldaw a panagipila iti kandidatura, adu ti nadlaw tayo iti opisina ti Comelec, malaksid ti saan a naurnos a sestima iti mismo nga opisina adu kadagiti kailian a di makasurot weno makaawat iti nagsimple nga instruction. Sus maria kusina, kasano ngay nga agngayangay dagitoy a kakailian? Ultimo pila laeng, saandan nga agkikinnaawatan. Awan mayat a paudi, reklamoda a reklamo, dida la makaur-uray.

Ala, natural la seguro dagitan ta magagaran wenno excited da laeng nga agkandidato ta nabayag met ngamin nga awan ti barangay election. 2013 pay la daydi naudi a barangay elections ta ania ngay ngarud ket namin-anu a naitantan. Isu nga adu dagiti agdayamudomen ta didan magustuan ti garaw dagiti nakatugaw wenno agdama a barangay officials kadagiti barangayda. Isu nga adu dagiti naragsakan ta natuloy met laengen. Ngem kaskasdi kayong Angkuan adu ti maragsakan, adu met dagiti nakamisuot. Apay kunam, Kayong Angkuan, natural…dagiti agturposen ti terminoda. Dagiti three termers wenno namitlon a nabotosan a nagsasaruno, agturposdan. Idinto ta kakaasida piman a nangidawdawat a maitantan koma manen. Ngem sus ina, uray koma met no ammom nga adda nagapouananda wenno naipropos da a pagimbagan ti barangayda.

Asino pay dagiti nakamirugrog kunam kayong? Natural dagiti kagawad kas kada kapitan nga awan naar-aramidanna, ah. Ti kunam ibotos pay dagiti kabarangayanda? Ulaw laengen a dagiti mangibotos pay. Ti met intay dillawen kadagiti kailiantayo no maminsan dida arisiten a nasayaat ti kandidato nga inda ibotos. Gapu ta kumpare wenno kumaredan, sige lattan nga uray ammoda nga awan met ti kapasidad daytoy nga agbalin a barangay official. Sa inton nakatugawdan, nagadu a dayamudomda, sus maria kusina, koma kailian, kitaen tayon a nasayaat ti intay ibotos ta ditay ket agtuok manen iti manu a tawen no addanto pay election ah…ti rigatna no pasig to manen nga extension.

Ala ngaruden, kasta pay kakayong ta ne, overtime tayo manen, kasta pay ket ne nakaadu tayo manen. Babayoo, tsup tsup muahmuah.