Barangay election, Part 3

May 12, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Mayo 14, 2018, barangay election kalpasan ti lima a tawen. Aldaw a panangpili kadagiti talaga a maikari ken sidadaan nga gserbi kadagiti barangayda. Koma, kabarangayan saan tayon a basta paallilaw kadagiti nasam-it ti panagdildilana ngem inton nakatugawda, nganga a kunada. Iti naglabas a manu nga aldaw wenno siam nga aldaw a panagkampania, adu dagiti intay nadlaw ken nakita nga irregularities wenno panaglabsing iti pammilin ti Comelec maipapan iti barangay election. Kas pagarigan laengen ti panagikabil iti posters, addaka a nagikabil iti puon ti kayo ken poste ti electricidad. Ngem, ti pilawenmi, uray nayawagen iti Comelec awan met action-da. Isu a nagpakubeng kami laengen, makaammon dagiti kabarangayan no asino ti namnamaenda a makaidaulo kadakuada.

Ti pay pakasuronan mi, saan mo a makontak ti teleponoda. No panunoten, maminsan laeng iti unos ti tallo tawen a makumikom dagitoy. Iti biang dagiti kandidato, koma agtungpal tayo ta iti intay panagtungpal, ditoy a makita no asinoka. Ngem no nagsimple laeng a bilin wenno guidelines dimo pay masurot kasanu ngay no mapagasatanka ta adu’t kuartam ken adu’t kukumpare ken kumarem ket sika ti napagasatan, ania ngay dayta?

Kasta karugit ti pulitika nga uray iti kababaanen a benneg wenno agpang ta gobierno kabarangayan ida, adda lattan ti panaglabsing. Ta kasano met ngamin, nakurang ti ngipen ti linteg ken action dagiti maseknan nga akin-sakup iti daytoy.

Adu dagiti makapasugkar nga inkam napaliiw, kas koma iti panangdadel iti poster. Addaka dita a mabutawan babaen iti sigarilyo, no saan a mata, ngiwat ken maikkan iti sarana. Addaka dita nga agpukaw ta poster iti nakaikabilanna. Ngem ti kakaruanen ket isu ti panangibabam la unay iti kandidato a dimo ammo no ania ti kapasidadna nga ikumparam iti kababaan a kandidato. Sus maria kusina, uray pay kunam a rabakmo, madi ti kasta, ibagbagam ketdin a kutit ni kastoy wenno kasdiay a kandidato kunkunam ketdin. No ibagada met ngay kenka ti kasta ania ngay riknam durgi?

Ala, kakabsat kandidato koma, pagturayen tayo ti kinalamiis ti ul-ulo tayo kas nakunatayo, agkakabarangayan tayo, kalpasan ti election agsasabat tayo met laeng dita. Saan tayo koma nga agpipinnadakes ta madi dayta, saan a nasayaat ti adda kagurgurana nangruna no maysa a kaarruba. Pultika laeng dayta, saan koma nga isu’t mamagsina wenno mangpugsat iti nasayaat a linnangenyo a dua. Ta awan sabali a mangarayat kenka no saan a ni kaarruba no sika’t agkasapulan iti tulong.

Ala, kabarangayan, gibusanmi daytoy a kolum mi iti inkam panangkablaaw kadakayo amin. Ania man ti gasatmio iti umay a Mayo 14, awatem koma a sitatakneng ken sitatalinaay, dayawem ti pangngeddeng dagiti kabarangayam.

Ala ngaruden, kasta pay kakayong ta ne, overtime tayo manen ket ala kasta pay… babayoo, tsup tsup muahmuah.