Baro a banuar kanu!

February 17, 2018 Opinion Sirmata ken Tagtagainep ni Mang Gusting

Naimbag nga oras yo amin kailian ken kaarruba, adtoy manen ti nanumo a pagayamyo nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken nakaradkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Saan koma ngarud a dagensen ti barukong ti intay pasaren, Kakayong mi ida.

Ala, sapay la koma ngarud ta umisem kayo man iti daytoy inkam ipadigo ita. Saantayo koma a liplipatan tay kunada a ti panagkatawa ket nabileg nga agas iti aniaman a samsamuyeng. No aniaman dagiti pakadukotam, iwagsakmo pay laeng ket dumanggayka kadakami ita a gundaway.

Iti panagsarak da Jun ken Mang Gusting, adda dinamag ni Mang Gusting ken Jun… ket—

Gusting: Nadamagmo kadi diay anghel a bimmaba, Jun.?

Jun: Anghel kunam Mang Gusting?

Gusting: Anghel a nagiwaras iti surat kadagiti napipintas a babbai ken naguguapo a lallaki. Ammom kadi no ania ti linaon ti surat, Jun?

Jun: Saan, Mang Gusting.

Gusting: Malasmo ngarud, ah…linabasannaka!

Wahahahahahaa!Agngirsi kayo met a uray no kasla ngirsi ti napuoran nga aso.

Ala umdas daytan para ita a lawas, intay man lukaisan a sublian ti napalabas a damag kangrunaan ti kaso ti maysa a kailian tayo nga OFW wenno overseas Filipino worker a no sadino ket nasarakanda ti bangkayna iti freezer piman, siempre natayen…pinagbalinda a kasla ikan wenno lames a nai-freezer. Anian a nagkas-ang kailian, isuda ti ibagbagada idi a “Baro A Banuar” ti pagiliantayo ta isuda ti dakkel ti maipapaayna a dolyar iti pagilian babaen kadagiti remittances da. Dayawenmi la unay ti madagdagus nga action ti gobierno Duterte ta inaramid da amin a kabaelanda tapno mayawid ti bangkay ti nakakaasi a kailian tayo. Daytoy met ti nangararon iti luksaw ket naikeddeng ti gobierno Duterte a maipasardeng pay laeng ti pannakaibaon dagitoy a banuar tayo iti pagilian a Kuwait. Saan laeng a dayta, nakisarita ti Presidente ti Pilipinas iti gobierno ti Kuwait a maikkanda koma iti amnesty dagitoy makuna a TNT weno dagiti tago ng tago a kailian idiay ta idi agpaso ti panagtalinaed da idiay, naglemlemmengda tapno saanda laeng a mapaawid piman.

Adu dagiti napaawid ket dayawen tayo man met ti akin kukua iti maysa nga Airlines ta intedna a libre ti pannakayawid dagitoy a kailian tayo. Ngem adu met ti agriri kadagiti agap-aplikar iti nasao a pagilian ta adu ti maapektaran wenno maawanan trabaho. Kuna ti Malakanyang a mabalin nga agsubli dagiti nagbakasion no la ketdi ta isu met laeng ti amona. Ala ket adalen yo a naimbag apo a mangiturturong no ania ti pagsayaatanna ta adda met dagiti adda idiay nga OFW a nasayaat ti kasasaad da ta saan met ngata nga agpapada ti gasat ti maysa a tao. Adda met dagiti am-ammotayo nga adda sadiay a natalged met ti kasasaadda. Ken maysa ania, saan met nga umili ti Kuwait ti nagaramid iti kinadamsak iti OFW a kailiantayo, gangannaet met iti daydiay a lugar.

Ti maudi nga inkam maibaga, kasta koma apo a mangiturturong ti kinapartak ti aksyon tayo no adda dagiti kailian tayo nga OFW nga ibagbagada a baro a banuar ta pagaammomi, saan laeng a dayta ti parikut a paspasaren dagiti kailiantayo a baro a banuar iti nagduduma a paset ti lubong. Koma, agtignay a dagus ti ahensia ti gobierno nga akin-sakup iti dayta tapno maipaayan ayuda dagiti nakakaasi a kailiantayo a mairurumen weno marabngios ti kalinteganda kas tao ken anak ti Dios. Kudos kadakayo. Mabuhay kayo.

Ne, ne, ne, Kakayong naimasantayo manen a kunak isu a baliwantay to manen, a. Kasta pay pare Jun, Editor Thom, nangruna ken Ading Melanie a nakaan-anus a mangur-uray iti kulom tayo, ania kumusta met ti date mo idi aldaw dagiti puso, Ading Pintas? Agkakape tayo man no maminsan dita opisina, mailiwak met a maki-innistorya ken maki-igup iti kape kadakayo, kasta pay, babayooo. Tsuptsup muahmuah.