Baro nga ex-officio member ti La Union SP, nagsapata

May 8, 2018 Headlines

SIUDAD TI SAN FERNANDO, LA UNION – Pormal a nagsapata ti baro a kameng ti 21st Sangguniang Panlalawigan ti La Union Erwina C. Eriguel kas ex-officio member idi Mayo 3, 2018 iti Speaker Pro Tempore Francisco I. Ortega Legislative Building and Session Hall.
Ni Eriguel ti agdama a punong barangay ti Sta. Barbara, Agoo ken bise-presidente ti Liga ng mga Barangay-La Union Chapter.
Isuna ti timmakder kas presidente ti Liga kalpasan a nagikkat ni Manuel Victor “Mannix” R. Ortega kas barangay captain ti Barangay Canaoay, City of San Fernando, ket inibbatan daytoy ti posisionna kas presidente ti Liga ng mga Barangay iti San Fernando City ken La Union Chapter idi Abril 30, 2018.
Ni Gob. Francisco Emmanuel “Pacoy” R. Ortega III ti nangiyuna iti panagsapata ni Eriguel a kadwada Vice-Governor Aureo Augusto Q. Nisce, Second District Rep. Sandra Y. Eriguel, Agoo Mayor Stephanie Y. Eriguel, dati a congressman Eufranio Eriguel ken dagiti kameng ti SP.
“I will do everything to the best of my ability,” kinuna ni Eriguel iti inaugural speech na kas miembro ti 21st Sangguniang Panlalawigan.
“You are in good hands under the leadership of our vice-governor and we will continue to support the Liga ng mga Barangay,” insigurado ni Governor Ortega iti welcome message daytoy.
Nasurok a sangagasut a bisita ti nakipaset iti oath-taking program a pakairamanan da Agoo Vice-Mayor Henry Balbin, dagiti barangay kagawad ti Sta. Barbara, Agoo, punong barangays ti Agoo ken dagiti presidente ti Liga ng mga Barangay iti probinsia.
Ni SPM Eriguel ti mangibagi iti Liga ng mga Barangay iti Sangguniang Panlalawigan ken agtuloy kas chairperson dagiti komite iti Component City, Municipal and Barangay Affairs ken Youth and Sports Development inggana a madutukan manen ti kabarbaro a presidente ti Liga kalpasan ti May 14, 2018 Barangay and SK elections. JJDMARBELLA, PITO-LU / ABN