Basurang itinapon mo, babalik din sa iyo

February 5, 2018 Editorial

Pobreng lungsod ng Baguio… may pera, may lupa, subalit walang lupang mapagtapunan ng sariling basura nito, ito ngayon ang pinagdadanan ng lokal na gobyerno sa kabila ng limpak-limpak na salapi ay hindi makakuha ng sariling basurahan nito kundi sa bayan pa ng Capas, Tarlac at sa lungsod ng Urdaneta.
Kamakailan lamang ay nagreklamo na ang bayan ng La Trinidad, Benguet dahil sa Barangay Lamtang ang garbage transfer station bago pa ito dahil sa Capas at dahil sa reklamong ito ay naghanap ng ibang waste transfer station ang contractor nito at pansamantala ay ginamit ang bayan ng Tuba na halos kalapit lang ng Dontogan Barangay sa may kahabaan ng Marcos Highway.
Ang siste ay may mga residente na nagpila ng reklamo na ang pagkakaroon ng garbage transfer station sa Tuba ay magdudulot ng kapahamakan sa kalusugan ng mga kabataan o ng mga mamamayan sa bayan ng Tuba.
Nagsimula ang paggamit sa nasabing lugar noong buwan ng Enero at ayon sa lungsod ng Baguio ay pag-aari ng Department of Agriculture at inayunan umano sila na pansamantalang gamitin ang nasabing lugar.
Naalarma ang bayan ng Tuba kung kaya’t naglabas ang Sangguniang Bayan ng isang resolution na sinusuportahan nito ang reklamo ng Upper Poblacion Barangay na hindi dapat doon ang tapunan ng basura ng Baguio dahil may nakaambang problemang pangkalusugan ito.
Ang Resolution No.18 ay pinangunahan ni Tuba Vice-Mayor Clarita Sal-ongan na ayon sa opisyal ay may katwiran umano ang mga residente sa kanilang petition na alisin ang nasabing garbage transfer ng Baguio.
Ayon sa petisyon ng mga taga-Tuba ay lubhang nakakaapekto sa kanilang kalusugan ang ginawang tambakan ng basura na halos di kalayuan sa karamihan ng residente. Idinulog na rin umano ng mga taga-Tuba ang kanilang hinaing sa tanggpan ng Environment Management Bureau (EMB) ng Department of Environment and Natural Resources ang kanilang petisyon upang gawan ng paraan na mailipat sa mas malayong lugar ang nasabing garbage transfer station ng Baguio.
Hindi rin umano nagsagawa ng “public consultation” ang mga opisyal ng Baguio hinggil sa plano nilang paglagay ng tambakan ng basura sa nasabing lugar kung kaya’t nagulat na lang sila nang may mga truck ng nagtatapon ng basura sa nasabing lugar na kung saan ay malapit sa karamihan ng mga residente at mga eskwelahan na maaaring magbigay ng sakit sa mga residente lalo na umano sa mga bata.
Ipagpalagay na natin na pinayagan ng DA ang lungsod na magtapon ng basura sa may Tuba ngunit nagpaalam ba sila sa mga taong nakapaligid sa nasabing bayan? Ito na nga ba ang sinasabi natin na ilang taon nang naging mayor at kongresman si Mayor Mauricio Domogan subalit hanggang ngayon ay hindi pa rin nakakahanap ng lugar na masasabing garbage site ng lungsod, sayang naman ang milyon-milyong salapi ng lunsod kung hindi tayo makakagawa ng sariling sanitary landfill ng Baguio. Isang malaking hamon ito sa liderato ni Mayor Domogan na bago matapos ang kaniyang termino ay magkaroon na ng sariling basurahan ang lungsod. TFP