BBM-Sarah Proklamado na!

Sa wakas sa ganap na alas 6:42 ng gabi ng Mayo 25, pagkatapos ang napakabilis na canvassing…naiproklama na bilang pangulo at ikalawang pangulo ng Pilipinas sina Pres. Ferdinand Marcos Jr. (Bongbong) at Sarah “Inday” Duterte Carpio.

Naging makasaysayan ang eksenang ito dahil sa laki ng lamang nila sa kanilang kalaban noong eleksiyon, ngayon lang tayo nagkaroon ng kauna-unahang Majority President at Vice President sa katauhan nina BBM at Inday Sarah.

Nagbunyi ang lahat lalo ang Canvassing body (Senate/House-Congress) dahil natapos ang kanilang trabaho sa loob lamang ng dalawang araw.

Katunayan, ayon sa ulat, isang dahilan sa mabilis na canvassing ay sa suportado ito ng mismong mga nakatunggali ng dalawa. Walang naging sagabal sa bilangan.

Kudos kina VP Leni, Sen. Pangilinan at Mayor Isko. Walang mapagsidlan ng saya, paghanga, pagrespeto at pagsaludo sa naganap na canvassing at proklamasyon. Mga kapamilya ni BBM pati na ang halos di na makalakad niyang inang si Imelda ay kasama. Punado naman ng marami na nag-iisa lamang si VP Sarah nang naiproklama. Maaring di lang sila sumama sa entablado.

Mabuhay tandem BBM-Sarah – ang ating bagong Pangulo at Bise presidente! At ngayong proklamado na sila…ang susunod ay ang kanilang pagsisimulang manungkulan sa Hulyo pagkatapos ng termino ng mga nakaupo hanggang Hunyo 30.

Tunay na kapanapanabik ang susunod na mga araw. Muling makakabalik ang mga Marcos sa Malakanyang at hindi naman mawawala ang anino ni Pres. Duterte (Digong) dahil kay VP Sarah.

Kasaysayan muli ito na dapat itala, ika ng marami. Pero sa likud ng kanilang tagumpay na tagumpay din sana lahat ng ating bansa….may mga kurokuro, obserbasyon, analysis, pangamba at mga pagtatanong pang naghihintay ng kasagutan. Maramil lahat ng mga ito ay matutugon sa loob ng panunungkulan ng dalawang opisyal lalo na sa panig ni Bongbong. Subukan nating pasadahan ang ilang katanungan ng madla:

Tunay daw kaya ang pagkakaisa at wala ng mga sagwil sa panunungkulan ni BBM? Wala kayang mga nakatagong pagkilos ng mga kontra upang sirain ang landas na pangakong pagkakaisa?

Sa likud ng mga nalagpasang batikos at paninira…mababaon na kaya ang mga ito sa limot o kaya’y sasabay parin habang nakaupo si BBM?

Makakalkal kaya ang isyu ng mga nasamsam noon na mga pag-aari ng mga Marcos? Mababago na kaya ang pananaw sa mga sinasabing negatibong kumento kontra sa deklarasyon noon ng Martial Law?

Papano raw ang gagawing pagbalangkas sa itinala na sa kasaysayan ng Pilipinas ang mga diumao’y kasamaan ng martial? Nalimot na kaya lahat ng mga magagandang reporma at nagampanan ng dating diumano’y diktador na si Makoy.?

Magkakaroon kaya ng benggansa o paghihigante ? Yan at maraming iba pang nakabiting mga katanungan na dapat makitaan ng sagot sa pagbabalik ng mga Marcos sa Palasyo. Sa panig ng Daplis…mas mainam na ating hintayin ang mga susunod na kabanata. Tayo ay tiklop-palad na umaasa ng panatang – “Pagkakaisa” ni BBM at Sarah.

Sa punto ng mga centrists (hindi makakaliwa at makakanan) o nasa-gitna….sa nakuhang suporta ng nakararaming mamamayan nina BBM at Sarah….nangangahulugan na mas marami ang may gusto sa pagbabago, pagkakaisa at mas maunlad na bansang Pilipinas.

Kung ang maraming bansa sa mundo ay nagpahayag na ng kanilang suporta sa susunod na administrasyon….tayo pa kaya na direktang sakop ng serbisyo ng ating pamahalaan and di makipagkaisa?

Sabi nga ng mga praktikal ang pananaw: gobyerno at mamamayan ay dapat magkaisa at magtulungan para sa ating pag-unlad. Isantabi ang siraan at ituwid ang mga likul-ikong daan.

Ang nakaraan ay gawing aral at pondasyon para sa mas matatag na hinaharap. Hindi para sa atin ang kasalukuyan kundi para sa darating pang henerasyon ng lahing-Pilipino. Adios mi amor, ciao, mabalos

Daplis Walang Mintis

Amianan Balita Ngayon