Betrayal of public trust? Nagadu ketdin!

Kas iti sigud a di nagbaliw kailian, naimbag nga oras tayo amin. Kayong Angkuan ken Ikit Juana ken dakayo amin pada a senyor citizen, mag-an wenno kumusta metten ti biag tayo. Ania met ti madamag kadagiti madaydayaw a luglugartayo. No dakami met ti kas yo damagen, adtoy maul-ulaw latta kadagiti mapaspasamak iti aglawlaw ditoy ayanmi. Agtuleng pay ketdin datao ta gapu iti ungor ti para abut da iti kalkalienda a kalsada, sukatanda kano ti samento este semento a kalsada ngem, mabalin pay met ti panagkunami.

Apoww…kablaaw pay laeng dayta kadakayo ngem madi manen ti intrada tayo ta kasla umuli manen ti royal blood ko gapu kadagiti mapaspasamak iti aglawlaw tayo. Kas iti kunada a road widening ditoy ayanmi a batug. No lablabsem ti agsao, sangsangadangan ti limmawaanna ngem, sus maria kusina, daytoy manen ti mangbekkel a lalu iti trapiko nangruna inton ngilin wenno Semanta Santa nga agdaluson dagiti sangaili ditoy siudad.

Back to our main topic kailian, adda dagiti proyekto ti gobierno a road widening ngem unayen ta awan pay sanga-agpa. Kasano ngay dayta met ken speaking of project, adda tay proyekto ti barangay ditoy purokmi, waiting shed Kayong, agasem makapaluksaw ken makaparurod. Agasem ta diay waiting shed ket nakalinged met hahaha. Kasano ngay a makitam tay sumungad a lugan? Sus, maria kusina, awan met laeng serbina dayta a waiting shed. Dida pay la inggatang iti kalding sada inyawis ana, Kayong, hahahaha.

Ne, ania manen ti nabasa tayo a damag, Kayong, adda manen supplemental complaint nga impilada iti lower house of congress kontra ken President Digong. Daytoy ket betrayal of public trust, culpable violations of the constitutions and committed high crimes. Daytoy ti impila ti maysa a congressman. Betrayal of trust, nagadu ketdin! Ket, dayta kailian ti nadakamat tayo manen iti napalabas nga isyu tayo. Makauma a talaga dagitoy a damag imbes nga agpanday da iti linteg a mangbuangay iti kanayonan a trabaho dagiti umili a Pilipino tapno makerrasan ti pannakapanunot dagitoy iti dakes. Nga isu daytoy ti ramut ti amin a krimen kunatayo manen abusta addayta latta ti isyu ti droga wenno shabu. Adu latta ti naulaw a kasla nagsida iti birabid nga uray ammoda la ngaruden a dakes ti ar-aramidenda sige latta, ket ti dakes, isu daytoy Kayong Angkuan.

Adda ti maysa pay a damag a makapaburek iti royal blood ko. Agasem, maysa kanu a kameng ti PNP wenno polis ti naduktalanda a makiki-pot session? Iti kallabes, adda kanu a kameng ti polisya ti natiliwanda a madama iti pot session iti maysa a siudad iti Metro Manila. Agasem dayta a kalanggongan dagitoy a pinarsua ti Diyos a Mannakabalin Amin. Sige, ibartolina yo dagita wenno saan, husto diay kuna ni Presidente Digong nga isubliyo ti dealth penalty wenno dusa a bitay ta pagbalinek a balaybay dagiti sinalbag a drug pusher wenno drug lord. Ket daytoy ngarud, gapu iti pannakatiliw da iti nasao a polis a makikipagpot session, imbilinna iti PNP internal affairs service ti nainget nga imbistigasyon ken mangsolbar iti daytoy a napasamak.

Wen kailian ken Kayong Angkuan, ania ngay dagitoy a damag? Ania dagitoy a maar-aramid metten. No pudno daytoy, anian a nagmadi a damag ken nagdakes nga aramid. Addayta, imbilin ti PNP chief ti madagdagus a pannakaikkat it serbisio daytoy a pannakabagi ti linteg nga agar-aramat iti droga. Nagdakes nga aramid, no mano a tawen a sinalsalakniban daytoy ti dayaw na kas maysa a pannakabagi ti linteg ngem, iti apag-kanito dinadaelna. Polis nga addict? Sus maria kusina, ania itan dagitoy a maar-aramid iti aglawlaw tayo.

Opssss, kayong Angkuan, delikadon. Nalabsak man ti nagis-istoryan ket naglabes manen ti orasko. Dakesen…agawidak pay, narigaten no umaynak manen suroten iti binalsig ni Sofing. Babayo, tsuptsup muahmuah.

Sirmata ken Tagtagainep ni Mang Gusting

Amianan Balita Ngayon