Bitay, mayat ka?

February 11, 2017 Opinion Sirmata ken Tagtagainep ni Mang Gusting

Naimbag a kanito tayo amin kailian nga awan labasna. Sadino man a batug ti langit ti ayanyo. Ania ngay ti madamag, kakailian. Okey kadi met laeng ti kasasaad yo dita? No dakami ti kas yo kayat nga ammuen kailian, nasayaat a saan. Ania ti gapuna a saan? Sus, adu ti rason no apay kailian.

Maysa kadagiti kangrunaan ita kailian a mapagpapatangan nga agpapan iti barbershop ni Ka Atong ket maipapan iti death penalty wenno dusa a bitay. Plano dagiti mammanday linteg nangruna iti nababa a kongreso a riingen ti dusa a bitay Kayong. Ania’t makunam… sus, dakesen, narigaten ti agloko-loko no kasta. Ngem, hahaha, relaks, saan met a basta nagbasol ket madusan iti bitay.

Segun iti nabasa tayo a damag Kayong Angkuan, sipud na-abolish ti dusa a bitay idi 2006, adda 3,000 a porsiento ti ngimmatuan ti heinous crimes. Agasem ngay dayta. Nakaam-amak, Kayong. Segun pay iti kanayonan a damag ania kailian nga intay naala, adda agarup kano a 6,204 a ngimatuan wenno bilang dagiti convicted iti heinous crimes kalpasan a pinaisardeng pasado a presidente Gloria Macapagal-Arroyo ken agdama a representante ti Pampanga, idinto ta idi adda pay la ti death penalty adda agarup laeng a 189 a convicted iti heinous crimes. Sus, kitaem man Kayong Angkuan ti dakkel a naggidiatanda iti bilang.

Kadagiti naglabas nga aldaw, konkondinarenda met ti agdama nga administrasyon gapu iti kampania kontra iti droga. Adu ngamin kadagiti natay a naiwalang ti maatap nga adda pakainaiganna kano iti droga. Ket isu daytoy ti dildillawen dagiti sumagmamano a grupo ket ibagbagada nga extra judicial killing. Ngem kas nadakamat tayon iti kallabes, no daytoy dusa a bitay ti mangpasardeng wenno mangpabassit iti krimen, apay ketdin a saan nga isubli, tangay dagiti met laeng kombiktado iti heinous crime a makuna dagiti kandidato iti dusa a bitay. Isu a kinarit ti agdama a prisidente dagiti mangkonkondinar kenkuana.

Adu ngamin ti mangibagbaga nga adda man dusa a bitay wenno maisubli ti death penalty awan met mapasamak, isu met laeng nga adu ti mapasamak a krimen ngem kinarit ti agdama a prisendente dagiti mangibagbaga iti kastoy a no sadino ket kunana. “Sige isubliyo ta kitaek no diak pagbalinen a kurtina dagiti bagtit dita, bitayek amin ida,” kas kinuna daytoy.
Apowwww, dakesen, Apo no kasta. Urayen tayo pay a kasta ti linteg tayo, satay agnakem? Malagipko no saanak a nagbiddut sipud adda nakemkon ni laeng sigud a presidente Erap ti nakaaramid iti dayta. Segun iti ammok, a ngem no nagbiddutak, sorry laengen ta isu’t ammok kunak met Kayong hahaha.

Ngem ti makunami ania, maisubli man ken saan, agpada, no talaga a dayta ti makaisubli iti urnos ken linak iti ingungoten tayo a daga a nayanakan ta sobran ti kaadu dagiti nakaam-ames a krimen a maar-aramid piman ket ti dakesna, kaaduanna pay a biktima dagiti inosente. Ket ti nasakit, gapuanan kano dagiti sinal-ot a drug addict. Ania’t makunam ngay Kayong? Sakbay nga innak gibusan toy istoryata ania, ania’t makunam? Dakayo man a readers mi ti ABN, ania’t makunayo, umannugot kayo kadi a maisubli ti dusa a bitay wenno death penalty?

Bueno, Kakailian, agingga manen ditoy ti intay panagiinnistorya ta inkam man pay kumape ken Apo Editor Thom dita nay ayan pagkapkapian dagiti pada a dual citizen, nagmayat ngamin ti agigup iti kape barako…sus, ina aya, anian a banglona. Kayong, mapantayon agpaypayapayen ni Bro Jun. Babayooo, tsuptsup muahmuah. Adios mi Amor!