Bukod nga Strawberry Farm ti Baguio, maisaksakad

Latest News

SIUDAD TI BAGUIO – Manamnama nga agbalin a baro nga atraksyon para iti panakaital-o ti turismo ti siudad no malpas a maisakad ti lokal a gobierno ti Baguio ti naurnos a pannakailukat ti Bilis Strawberry Farm iti Sitio Bilis, Sto. Tomas Central.

Kinuna ni Councilor Leandro Yangot, chairman ti committee on market, trade and commerce, a saan nga agdardaras ti siudad. Nasken ti naan-anay a panagadal wenno pannakaipatungpal ti programa para iti naurnos a panagtaripato kadagiti turista kasta metten ti panakaipanamnama iti nalinis nga aglawlaw kadagiti umili, kuna na.

Innayon na a kalikaguman ti lokal a gobierno a liklikan ti saan a naurnos a panakaibelleng dagiti basura kasta metten ti nakurang a panagsagana dagiti umili no sumangbay ti adu a bisita a kas ti napasamak iti Sitio Kabuyao, Poblacion, Tuba, Benguet idi limmatak ti Sitio “La Presa”. Kinunana pay a nasken nga maadaan ti Environmental Fee ti nasao a pasdek para iti panakamintinar daytoy.

Kabayatanna, inlawlawag met ni Councilor Elmer Datuin, mangidadaulo iti committee on tourism, nga saan a makikomkompetensia ti Sitio Bilis Strawberry Farm iti La Trinidad Strawberry Farm. Kinuna na a sursuruten laeng ti siudad ti singasing dagiti miembro ti Sto. Tomas Bilis Farmers Association idi selebrasion ti Urban Farmers Month idi napalabas a tawen ken kasta metten ti potential ti tallo-ektaria a daga iti nasao a pasdek tapno agserbi kas atraksyon para kadagiti turista.

Iti agdama, masarakan iti Bilis Strawberry Farm ti san andreas a klase ti strawberries. LALAINE T. PAYAY, UB Intern