Bumanerberennn Kayong!

September 2, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan sukimi. Ania ngay, panagkunak ket simmingising metten ti init dita batbatugyo ania.

Wowww, nagmayat ti pammasungad ti bulan a pangrugyan ti kunkunada a Berrr Month kayong ta ditoy batug mi a langit ket kasta unay rayray ti init. Mangted namnama ti rayana a lumbes kadagiti bantay iti daya ket kasla ipasimudaagna ti baru a namnama. Naggasaten daytoy nga agsapa ta malaksid ti panangted manen ti Apo a Namarsua iti gundaway kadatayo a mangsirmata iti lawag ken kinangayed ti nakaparsuaan, kalpasan ti makabulan, makaaabukay rikna ti siray ni Apo Init.

Husto la unay Kayong diay kunada, iti labes wenno likudan dagiti ulep adda latta sadiay ti rayray ni Apo init. Daytoy ngamin ti adatna, no maminsan saan nga agpapada ti kararag wenno kalkalikaguman tayo, adda dagiti mangikarkararag nga isardengnan wenno saan koman nga agtodo ngem iti sabali a bangir, idawdawat met dagiti kakabsat a mannalon ti panangibuyatna iti todo ta isu’t mangbisibis kadagiti mula ken raepda a pagay wenno mais kas kada nateng nga isu met ti kangrunaan a taraon ni Pinoy malaksid kadagiti agin-a-amerikano, hahahaha, bari-bari puera an-annong a kunada. Hahahha.

****

Ngem, ala, kasta la ti biag a kunada…no matay agunnat ken natural a nangisit kano ti negro, wahahaha, nagadu la ketdin aya Apo nga ammo ti tao. Addapay nagkunan a di makapudpudno ni Apo Dios ta saan a maymaysa ti kalikagum wenno kayat tayo. Ngem para kadakami, no dumteng man ti tiempo ti nepnep a kunada, anusan tayo ta isu met ti panawen a panagtalon ken panagmula dagiti ingungoten tayo ken pudpudno a banuar tayo, isu dagiti mannalon. Ditoy Pilipinas, innapoy ti kangrunaan a taraon ni Pinoy, no kasta ngarud no awan mannalon, no saanda a makatalon ta ditay met kayaten nga agnepnep, kasanun? Makan aya ngarud ti bingkol Kayong? Sus maria kusina, sa ket nagadu ti agreklamo a ngumina ti bagas nangruna kadagiti inangkat ti gobierno, kasanu laengen, ania laengen, no saanda kanu met nga agangkat awan kanen tayon ta maiduldulin sa met dagiti apit tayo ta mayuray iti kangina ti presio hahaha.

***

Ala, libtawan tayo man dayta a topiko ta kuskusilapannak ni Ikit Huaning, kunak ni Mildred ti kuskusilapanna ta kasta unay pallayog ti patungna a limmabas ket pinaludipan ni Kayong Angkuan, saan met ta siak gayam ti kuskusilapanna. Ayna, maulawak Mildred hahahaha. Saanka nga agdanag ikit Huaning ta uray ania’t mapasamak nga uray pay manu a Mildred ta lumabas ken agpaspasirpat, diakto isukat ni Sofing ko, heheheh. Apo unayen aya, ania’t makunam Pare Jun dita, agtimek ka met ah, naulawkansa metten ken Mildred.

Timmapog tayon Kakayong ken kaaaruba. Ania ngata manen dagiti pasaren tayo kadagitoy a bulbulan agingga iti agngudo manen ti tawen. Ania man ngatan ti agur-uray a gasat kadatayo iti umay a 2019? Ammok nga adu manen dagiti manglapayag ti isemna ta no matuloy, mid-term elections ket natural, namnamaenda manen ti layos ngem saan a todo ngem ketdi tay papel de banko a tallo ti taona. Wen nga agpayso ania, adda kaarrubak, tunggal madanun ti elections, ag-leave iti trabahona ngem kalpasan ti election, agsubli…na, ah, masmadawak a talaga. Ngem nabuking ko met laeng idi agangay, nakaskasdaaw ta diay sigud a bisiklitana nasukatanen iti uppat pilid na. Oh, ania makunam Kayong Angkuan, Pare Jun, awan ngata’t milagro a napasamak bayat ti kampania? Ala, diskartena dayta a kunada, saanmon a lapdan…ta di ket ma bad trip. Ti laeng makunami, sapay la koma ta nagasat tayo amin ken mabaliwan met ti aura tayo tangay timmapog tayon ti berrrrrr month a kunada.

****

Sus nalpas ti ani…anak ti tukling a balo, kasta pay kakayong ta ne overtime tayo manen. Aglisi ka man dita Atong, ania man ta isensenyasmon, anunsio iti hueteng… agingga ita, dayta pay laeng ti ubram. Ala, ala, kalagem ngarud tay pangkis a pilay no ammom ti kalagna. Kasta pay ket ne, nakaadu tayo manen. Babayoo, tsup tsup muahmuah.