Burrrrr… apo kayong kumutokoten ti lammin na

Opinion Sirmata ken Tagtagainep ni Mang Gusting

Hellooo, hellooo… naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malibtawan. Kayat dakayo man a kumustaen kadagiti nadayaw a luglugar yo. Ni Kayong Angkuan, umunan nga aldaw ti September. Pangrugyanen ti bulan ti kunada a Ber month wenno Yuletide season, kayong. Kayatna a sawen, rugyam metten ti agisukbit iti itedmunto kadagiti annakmo iti buniag. Ta ne, kumutukoten ti lamminna no pumarbangonen.

Wun nga agpayso, kailian… aggibusto manen ti tawen ngem ania ti makitayo a nagbaliwan ti biag tayo? Ti pagilian tayo? Kasla nga awan ta nariribuk latta, ditay magun-od ti naan-anay nga urnos ken kapia. Kas pagarigan idiay Marawi City, nagadun ti pimmusay iti benneg man dagiti rebelde, pannakabagi ti linteg ken dagiti inosente a kailian tayo. Kaanunto nga aggibus ti panangriribuk dagiti makuna a kimmannigid a kailian tayo? Dagiti mangkonkontra iti linteg? Maysa pay, ania ti pagpatinggaan ti kampania ti gobierno kontra iti maiparit a droga? Iti kallabes, adda mayor a napapatay agraman sumagmamano a kameng ti pamiliana ket gapu dayta iti maatap a pannakainaigda iti maiparit a droga iti masakupanda. Ditoy, nakondena dagiti pannakabagi ti linteg a nangiwayat iti daytoy a raid, adu a kuesiyon nga isu pay ti pagtaktaktakan dagiti madaydayaw a sentong este senador agraman tongressman este congressman kunak koma. Apo ta maikaglis latta ti dilak apo aya. Wen kailian, saandan a maakem ti talaga a trabahoda nga agpanday koma iti linteg.

Dayta ketdi ti napaliiwmi, Kayong Angkuan, ti met la agher-hearingen ti ubrada imbes a mangpandayda iti linteg a mangted paggin-awaan tayo nga umili. No panunoten adda met dagiti umno a mangkita iti dayta ti makunami, no nagbasol ket adda ebidensia kas kada saksi, yulidan ti darum ket makaammon ti pangukoman a mangusig ken mangadal kadagiti maiparang nga ebidensia ken saksi. Tiraa…uray pay ania ti kasasaad ti biag ti suspect.

Koma, patas laeng ti hustisia, makitkitam tay simbolo ti hustisia Kayong. Ammom ti kayat a sawen ti babai idiay a nakaiggem wenno nangitag-ay iti timbangan? Kayatna a sawen, patas koma ti linrteg ngem, ania mapalpaliiwmo? Sus, Kayong, ti mapaliiw tayo, adda latta lamang tay adda kuartana ta mabalinna nga itantan ti amin, delaying tactics a kunadansa pay. Diak ammo no husto ti English ko. Kunada man ket a “justice delayed, justice denied” kastan sa ti kaipapanan ti nagadu nga imbistigasyon no asino la ditan ti mapabpabasol. Ket ti nakas-ang, diay polis a nangipatungpal iti pagrebbenganna, isunto pay la’t maladdit. Ano ba yan!

Adda pay gayam maysa manen nga isyu nga isu’t mangpaburek iti royal blood tayo Kayong. Nadamagmo kadin ti plano ti pamilia Marcos nga iteddan ti paset ti kinabaknangda iti gobierno? Nagpintas daytoy a planoda, ti makaparurod a maka-paluksaw, nagadu manen a kuestion. Porke agkiddawda kano iti pammakawan kadagiti umili, a kayatna a sawen inaklondan a nagtakawda. Sus mariosep dagitoy a tattao, no kasta met laeng a nagadu pay laeng a rikititos ken reklamoda, bay-amon…annak ti sal——ayna. Apo aya, ano ba talaga kuya!

Sakbay nga intay malipatan kailian, yebkasmi man ti kablaawmi manipud iti pamiliak ti nabara a kablaaw mi iti anibersaryo toy warnakan tayo nga Amianan Balita Ngayon iti maikainnem a tawen daytoy a mangmangted serbisio kadatayo a kailian babaen iti panangidanunna kadagiti damdamag ken isyu a nasken a malawlawagan. Maymaysa ti makuna a diak malipatan bayat ti panagsurat tayo ditoy. Awan sabali no saan a ti panagyaman tayo ken Apo Thom Picana nga editor in chief iti panangtedna iti gundaway tayo a mangipeksa iti an-anekeken tayo babaen iti nanumo a kapanunotan tayo. Ti gundaway tayo a mangasa iti nanumo a pluma tayo. Ket dakkel a banag daytoy a naited kadatayo a gundaway. Bigbigento toy numo dayta a pabor a naited kadatayo….

Ala, kayong, nalpas manen ti puli, naimasak metten ti naki-innistorya kadakayo ti sango ti tiangge ni ikit Kuanang. Baliwan tayon to manen ta ne, dakesen, amangan isurotda manen ti binalsig. Nalipatak tay pagatgatang ni Sofing. Babayo, tsuptsup muahmuah.