Butaw ditoy, butaw idiay

March 11, 2017 Opinion Sirmata ken Tagtagainep ni Mang Gusting

Yahooo, yahoo.commm… halo-haloo, nagmayat ti agkiwar ti halu-halo no dita patad ta napudot wenno nadagaang ti panawen ta mangrugin ti kalgaw ngem, ditoy batugmo a langit kasla di pay unay mayannatup dayta panagsudsod iti halu-halo ta nalammin pay laeng nangruna no pumarbangon ken sardam. Sabali ketdi ti makitkitami a masudsodsodan wenno madugdogsol ta dagiti met nagpipintas pay laeng a kalsada, Kayong Angkuan. Ngem, ala kumablaaw kami pay nga umuna, Kumusta ti biag Kayong Angkuan?

Kalpasan ti flower festival ditoy siudad ti saleng a no sadino ket nagdudupodop ti adu a turista wenno sangsangaili naggapu man iti nagduduma a lugar iti pagilian ken dagiti naggapu iti sabali a pagilian, sumaruno met ti Semana Santa ket manamnama manen ti kaadu dagiti sangaili nga umay agpalamiis ken mangpasyar kadagiti nangangayed ti lugar wenno tourist spot iti siudad. Ngem, ania ngata ti reactions da no ti makitada ket dagiti nabutta-buttawan a kalsada ngem, limpio pay laeng. Sus, makasuron a makaparurod, Kayong Angkuan ta kasta ti maar-aramid iti nagduduma a paset ti siudad ken uray iti ayanmi a distrito. Adda maaramid a widening ken masukatan ti semento ti kamino real ngem, sus, maria kusina adunsa pay met dagiti lugar wenno paset ti siudad ti saan a nakaraman iti piltak ti semento ngem un-unaenda met dagiti nagpintas pay laeng a kalsada. Ngem, sabagay no widening ok laeng ngata, a.

Ngem, pagyamananmi Kailian ken Kayong Angkuan ta kas makitak daytoy la ti umuna a makitak a nabaket a proyekto ti agdama a set ti barangay officials mi. Ay, adda pay gayam maysa, tay welcome ark ti barangay ngem, kasla naisardeng kano metten. Amm…speaking of project Kayong Angkuan, adda pay gayam maysa a proyekto ngem daytoy ket initiative met dagiti homeowners iti purokmi. Na-endorse laeng ti barangay council ditoy ayanmi ngem, sus, maria kusina Kayong Angkuan no ammom la koma ti aberia a napasamak a no sadino ket ngimmato pay ti presyon ti royal blood ko sika. Ta kasano met kakaisuna a proyekto iti barangay mi koma iti las-ud ti tallo ken aguppaten a tawen a panagtugaw dagiti barangay officials, adda ketdin kagawad a nakakauna a nagpirma iti petisyon. Ungas a talaga a kagawad, imbes koma nga agyamanda ta nakadawat kami iti pondo para iti multi-purpose hall. Apowww, diak malapdan ti ag HB gapu iti kina-ongas ti dua a kagawad a nagpirma. Nupay kasta, naituloy met laeng ti nasao a proyekto ngem ammom no ania manen ti kasla pag-HB ken pagburekan ti royal blood ko, ita a nalpasen, kasla didakam metten ibibiang idinto ta dakami koma ti kasla priority nga agusar iti nasao a multi-purpose hall nupay daytoy ket makuna a pang-publiko!

Ala, adu kailian ti makuna a di kaaya-aya a mapaspasamak iti aglawlaw tayo ket kasla aglupiasen ti lubong iti pasig a parikut ket kaanunto ngata a maurnos dagitoy. Kitaem laengen, a, kasano a maurnos ken nasayaat ti gapuanan dagiti dadduma a barangay officials ania, nangruna kadagiti elected ket agingga ita, aguppat a tawendan sipud nagtugawda idi 2014, saanda pay laeng a nagkikinnawatan, nabingay-bingayda pay laeng. Kasano ngay dayta ket no panunoten manmanuda laeng, pitu a kagawad ken maysa a punong barangay. Ngem dida pay agkikinnaawatan isu nga awan manamnama a nasayaat a magapuananda.

Oppsssss…dakesen, Kayong Angkuan, kakadua a senyor citizens ditoy sango ti store ni ikit Juana, naimasak manen ti nagistorya. Surotennak to man ngatan iti binalsig a pagsungrod ni Sofing. Nalipatak manen tay pagatgatangna nga itlog a pamigatan mi…adu pay koma ti innak istoryaen ngem ala, babayooo. Tsuptsup muahmuahhh.