Candy Festival sa Baguio, pinagpaplanuhan

February 24, 2018 Metro BLISTT

Pinaplano ng Baguio Filipino-Chinese Community na magkaroon ng Candy Festival na maaring maging bahagi ng taunang selebrasyon ng Chinese New Year.
Sa katatapos lamang na selebrasyon ng Chinese New Year ay ipinagdiwang ang pagkakaisa at pagsalubong ng isang manigong bagong taon kasama ang pagsagawa ng tradisyunal na dragon dance na nagpapakita ng kultura ng mga Chinese.
Ayon kay Spring Festival Executive Committee Chair Peter Ng, nanggaling ang idea ng Candy Festival sa kaibigan niyang nagtatanong kung kailan ang Candy Festival. “I told him what candy festival are you talking about? It’s Spring Festival. But it gave me an idea, why not?”
Dagdag pa niya dito na magandang maging side event ito ng Spring Festival na idinadaos taon-taon para magkaroon ng highlight ang Chinese Spring Festival.
Naging isang kagawian na rin tuwing Chinese New Year ang paghahagis ng candy sa parada na nagsisimbulo ng swerte ayon sa mga Chinese feng sui experts. Ito na rin ang magiging symbolo ng pinaplanong Candy Festival.
Pinuri naman ni Mayor Mauricio Domogan ang Baguio Filipino-Chinese Community sa patuloy na pagsasagawa ng pagdiriwang ng Spring Festival tradition sa nakalipas na 19 taon. Dagdag pa niya na ang tradisyong ito ay nagsisimbolo ng patuloy na kooperasyon sa pagitan ng city government at ng Filipino-Chinese Community para sa ikauunlad ng lungsod.
Inalala ng mayor na ang Baguio City ay ang unang local government unit na opisyal na ipinagdiwang ang Chinese New Year sa ilalim ng Ordinance 18, Series of 1999.
Tiniyak naman ng Filipino-Chinese Community na mas paghahandaan pa nila at paplanuhing mabuti ang mga susunod na selebrasyon katulong ang city government. ALLAN LEMUEL C. SUNGA, UB Intern / ABN