Dagitoy sagut kadatayo ti Dios, nasken koma a saluadan

June 18, 2019 Opinion Sirmata ken Tagtagainep ni Mang Gusting

Kompanieros y kompanieras, ania manen ti putahe nga intay idasar ita a kolum tayo? Bueno, kadagiti napalabas, maipapan latta iti pakaseknan ti aglawlaw wenno pannakapreserba ti aglalaw wenno kinangayed ti nakaparsuaan a sagut kadatayo ti Naindaklan a Namarsua iti Sangkataoan.

Maipapan iti pannakaranggas ken pannakarames dagiti makuna a
Natural a buya tapno nangayed latta koma ti sinirsirmata ken tinagtagainep tayo a nangayed a pagnaedan ken pangbangonan iti umok ni ayat a kunada, ngem gaput kinaranggas ti tao, in-inut a
madadael dagitoy ta kunada dagiti maseknan, paset kanu ti
panagdur-as wenno development ti pannakaisakripisio dagitoy a luglugar wenno bambanag kas koma iti pannakapukan dagiti
kaykayo.

Iti kallabes kailian, nagbalin nga isyu ti maipapan kadagiti nagadu a basura nga inyeg ti pagilian a Canada ditoy Filipinas. Naikarga dagitoy kadagiti bagon.

Nagbayag nga isyu no kasano a maisubli iti nasao a pagilian
dagitoy a basura. Apay, basuraan aya ti Filipinas?

Awan naaramidan ti naglabas nga administrasion no kasano a maisubli dagitoy a toni-tonelada a basura. Ngem situtured ti
agdama ita a Pangulo a nasken a maipanaw dagitoy wenno maisubli iti naggapuanna.

Ket uray kasano kadakkel daytoy a pagilian, nagtungpal da a
maisubli iti nasao a pagilian dagitoy a basura a nayeg ditoy, manun a tawen ti napalabas.

Iti maysa manen a kabaraan nga isyu, isu ti aksidente kanu a
panagdinnungpar ti barko ti Tsina ken lugan dagiti Pinoy a mangngalap? Kalokuan.

Naglawa a baybay, agdinnungpar pay laeng dagiti nasao a barko? Pagbalbalinen datayo met a tanga la unayen. Gapu iti insidente, kenondenar ti gobierno ti napasamak.

Kuna ti kaaduana, aksidente wenno inggagara, ta maysa a pakaluksawan tayo ket isu ti panangbaybay-a dagiti nakalugan iti nakadungpar a barko, isu ti panangbaybay-a wenno pinanawan da dagiti mangngalap piman a kailian tayo a mangngalap.

Ay unayen a gasgasat ni Pinoy ta kanayon la a mairurumen. Gapu iti daytoy a napasamak, dimteng ti dadduma a puersa wenno barko ti
nagduduma a pagilian tapno bantayan da ti nasao a lugar ket saanen a maulit ti napasamak iti pagi-innagawan a paset ti west Philippine sea.

Apay kuna yo siguro a kastoy lattan ti interest ti nagduduma a pagilian a nagkuna a sakup da ti nasao a lugar? Ngamin, kakayong,
kakaaruba, nabaknang ti nasao a lugar kadagiti natural resources.

Saan laeng a marine life ngem ketdi, naipadamag pay idi nga adda LANA iti daytoy a lugar.N gem ania itan ti mapaspasamak kailian?
Maramramesen, no di man naramesen ti nasao a lugar. Kas
iti intay nadakamat, dagitoy ket sagut kadatayo ti Dios.

Nasken koma a saluadan, saan ketdi a dadaelen iti naipaay kadatayo
a sagut. Ngem ti maysa a makapasakit iti nakem, isu’t intay panaga-apa a no sadino ket maysan-maysa agkuna a kukua wenno sakup na ti nasao a lugar.

Adda pay dagiti madandanagan. Amangan no daytoy a susik ti mangisindi ken mamag-gil-ayab iti maikatlo a gubat sangalubongan.

Ania ngay ti banagen na no kasta ti mapasamak? Isu daytan diay
kunada nga awan-anay ti aramid ti tao, kagong-gongan a kunada.