Dalagitang NPA na nasugatan, nasagip

July 16, 2017 Provincial

CAMP BADO DANGWA, BENGUET – Maigting na kinondena ng Police Regional Office Cordillera (PRO-Cor) ang kilusan ng New Peoples Army (NPA) na patuloy na nangangalap ng mga menor de edad na ginagamit nila sa kanilang armadong pakikipaglaban sa gobyerno.
Ito ay matapos na isang sugatang 17 anyos na dalagita, estudyante ng Mataragan National High School sa Malibcong, Abra ang nasagip dakong 9am noong Hulyo 6, 2017 ng pinagsanib na pwersa ng Boliney police station at ng Philippine Army sa nakaraang engkwentro sa Boliney, Abra.
Bago ang pagkasagip sa menor de edad, nakatanggap ang Boliney PS ng text message mula sa isang concerned citizen na nagsasabing isang sugatang babae ang nagkubli sa tahanan ng isang Wilson Lawad sa Brgy. Amti, Boliney, Abra.
Nang rumesponde ang otoridad ay hindi nila natagpuan ang biktima sa naturang lugar at ipinaalam sa mga tumutugis na operatiba ng gobyerno na ang dalagita ay nailipat sa bahay ni Dino Tucyapao, kagawad ng Brgy. Amti, Boliney, Abra, kung saan nila natagpuan ang sugatang menor de edad at agad dinala sa Boliney PS.
Ang dalagita ay sinamahan ng MSWD, WCPD, mga magulang nito at ilang pulis sa Abra Provincial Hospital kung saan ito kasalukuyang ginagamot.
Sa isang panayam sa WCPD, sinabi umano ng dalagita na nakuha niya ang gunshot wound sa kaliwang paa sa kanilang engkwentro sa mga miyembro ng AFP sa Boliney, Abra noong Hulyo 1, 2017.
Ang ginawa ng NPA ay nagpapakita ng pababang bilang sa kanilang hanay at ang pagiging desperado ng mga ito sa paglinlang ng mga menor de edad para sa kanilang walang saysay na pakikipagdigma upang makamit ang pansariling kagustuhan, ayon sa PRO-Cor.
Ang pagkasagip sa 17 anyos na estudyante ay isang paalala na ang grupo ng NPA ay lubusang isinawalang-bahala ang deklarasyon ng UN Convention sa karapatan ng mga bata, at iba pang batas ng Pilipinas para sa proteksyon ng mga bata, pahayag ng PRO-Cor.
Sa ilalim ng pamamahala ni regional director PCSupt Elmo Francis Oco Sarona ay ipinagpapatuloy ng PRO-Cor, kasama ang AFP, ang pagsasagawa ng pursuit operations laban sa NPA sa iba’t ibang probinsya sa rehiyon ng Cordillera. PROCOR RPIO / ABN