De Lima at VP Leni, nagmamadali raw?

March 25, 2017 Daplis Walang Mintis Opinion

Habang sinusulat ang espasyong ito, nasa Thailand pa rin ang Pangulong Duterte para sa kanyang dalawang araw na official visit pagkatapos sa Myanmar. Kung gaano kainit sinalubong si Digong sa Mynamar, ganun din kainit sa Thailand lalo na sa mga Filipino community doon. Katunayan nga, nagkasundo ang Thailand at Pilipinas na lalo nilang paigtingin ang kanilang bigkis kontra sa ginagawa ng China sa West Phil. Sea. Na ibig sabihin, kaisa natin ang Thailand kontra China kung sa WPS ang pag-uusapan. Pero bago tumulak si Duterte sa Myanmar, may nasabi siya na parang ang gusto niya ay “hayaan na lang natin ang China”. Ipinaliwanag naman ito ng kampo Duterte na ang ibig sabihin ng pangulo ay “mapayapang solusyon dahil wala tayong ikakaya kung kakasa tayo ng giyera”. Sinundan naman ito ng isang pahayag kamakailan ni Pres. Digong na dapat ay huwag magmadali si VP Leni sa pagiging presidente ng Pilipinas. Patutsada niya ito sa harap ng Filipino community ng Myanmar. Pati nga si Sen. Trillanes ay nadaplisan sa mga patutsada nito kontra gobyerno. Hayy buhay nga naman. Akala natin nang mahalal na bise presidente si Leni Robredo, wala ng problema dahil napakainosente niya (daw) sa isyu ng politika. Pero ano na ang nangyayari? Silipin natin kasama na rin si Sen. Leila De Lima:

******

Bakit nasabi ni Pres. Duterte na parang nagmamadaling maging presidente si VP Leni? Upak ng mga analyst: mabigat ang ginawang pahayag sa pamamagitan ng video message ni VP Leni hinggil sa “Palit Ulo Scheme” ng Tokhang (EJK) dahil sa United Nations pa ito at hindi sa Pilipinas. Sabi nga ng mga eksperto, kung sa Pilipinas lang ito inihayag, maaaring mas magaan ang sipa. Pero buong mundo na ang nakaalam dahil sa UN niya ito idinaan. Malaki raw kasiraan ng Pilipinas ang ginawa nito. Kahiya-hiya diumano ang bansa natin sa nangyari. Sa mensahe ng bise presidente, inilahad nito na may “palit-ulo” daw sa Tokhang o kampanya kontra illegal drug. Na ang ibig sabihin ay habang di pa nahuhuli ang principal na suspect sa droga, ang mga kaanak muna ang babanatan. Bagay namang kinontra ni PNP Chief Bato De La Rosa. “Kung may maituturo pang mas malaking isda ang nahuling suspect, gagawin siyang witness para masakote ang mga mas malalaking sangkot sa droga. Yan siguro ang sinasabing palit ulo!”. Yan ang buod ng depensa ni Bato. Bakit nasabing parang nagmamadaling maging presdidente si VP Leni? Malinaw, ika nila na para ngang ganon ang takbo dahil sa kanyang mga ginagawa sa isyu ng EJK na nagiging kasiraan ng bansa. Kung masisira nga naman si Digong, sinong papalit, di ba siya (Leni)?

******

Dahil sa kamamadali diumano ni VP Leni, nasilip naman ng ilang abogado (Atty. Oliver Lozano at Melchor Chavez) ang mga kasong culpable violation of the constitution at betrayal of public trust upang isulong ang impeachment laban kay VP Robredo. Katunayan, naipadala na nila ang kopya kay House Speaker Pantaleon Alvarez. Ayon naman kay Georgina Hernandez, spokesperson ni Robredo, sila daw ay nag-aalala pero hangad nila na sana’y magkaroon naman sana ng tunay na prinsipyo ang mga mambabatas at hindi titignan ang reklamo nang may halong pulitika. Dagdag niyang hindi raw betrayal of public trust ang ginawa ni VP Leni dahil naglalahad lang daw ito ng katotohanan. Pero upak nga ng mga analyst: bakit doon pa sa UN ginawa at hindi na lang dito sa Pilipinas? Tuloy, pinag-aaralan na ng VACC sa pamamagitan ni founding chairman Dante Jiminez na pilahan din ng disbarment si Atty. Robredo dahil sa mga maling pahayag nito sa International Community.

*******

At bilang panghuli, ayon sa Korte Suprema, para ding nagmamadali si dating DOJ Sec. at Sen. Leila De Lima sa isyu ng mga kasong kinahaharap nito. Sa halip na hintayin ang pinal na resolusyon ng RTC (kung saan naka-file ang kaso nito) ay dumiretso na ito sa Supreme Court. Kaya tuloy sabi ni Associate Justice Leonin: hindi makukuha sa lakas at kasikatan ang tunay na hustisya. Dapat dumaan sa proseso. Abangan ang susunod na kabanata dahil lagpas na tayo sa espasyo. Adios mi amor, ciao, mabalos!