Death penalty binatikos, inupakan pero lumusot!

Habang sinusulat ang espasyong ito, lumusot na sa third at final scrutiny ng lower house ang House Bill 4727 o ang Death Penalty Reimposition Bill. Sa botohan ng mga kongresista, 216 ang yes, 54 ang no at 1 ang abstention. Ibig sabihin majority ang pumabor na dapat ibalik na ang death penalty o parusang kamatayan sa bansa. Bago ang botohan, grabe ang balitaktakan at pagdepensa ng mga mambabatas na tutol dito bagamat simple lang ang banat ng mga pumabor. Kapuna-puna na maraming babaeng kongresista ang kontra, kasama na riyan sina dating Pangulong Gloria Macapagal Arroyo na kasalukuyang Pampanga Representative, dating First Lady Rep. Imelda Marcos ng Ilocos Norte at Batangas Rep. Vilma Santos Recto. Matatandaang sa Arroyo administration inalis ang parusang kamatayan. Parang tumugma ang kasalukuyang panahon sa pangyayari dahil ngayon ang International Month ng mga kababaihan na ang tema ay “We Make Change Work for Women”. Naaayon din ito sa pondasyon ng kasalukuyang administrasyon na: “Partnership for change and full implementation of the Magna Carta of Women”. Tsk tsk, ang galing naman ng mga pagkakataon, di ba?

*********

Balikan natin ang mga upak kontra sa re-imposition of death penalty: sabi nila di tayo dapat pumabor sa pagpatay sa tao bagkus ang pagpapahalaga sa kanyang buhay na hiram at bigay ng Diyos. Di rin daw ito makabubuti para sa mga OFWs na nasa death row sa iba’t ibang bansa. Kaya nga daw tayo umaapela sa kanilang gobyerno na huwag nang ituloy ang pagbitay sa ating mga kababayang bibitayin dahil walang ganyang parusa sa ating bansa. Pero kung may Death Penalty na tayo para daw wala ng saysay na aapela pa tayo dahil gawain din natin ang pumatay. Mga kauring kumento pa ang upak ng mga kontra at buong pinakinggan at tinanggap naman ng mga namahala sa house hearing. Ngunit nanaig pa rin ang bilang ng mga pumabor bagamat ang bilang na 54 (kontra) ay masasabing mataas na rin bilang sagisag ng pagkakaisa ng mga tutol sa parusang kamatayan. Sabi nga nila hindi raw death penalty ang gawing panakot upang walang krimen dahil noong umiiral pa ito, marami pa rin ang nagmatigas at sumuway. Yan ang dahilan kung bakit na-abolish daw ito sa panahon ni GMA. Sabi naman ng nakararami: panahon na ngayon ng pagbabago sa pamamagitan ni Pres. Duterte. Marami na raw ang hindi takot sa mga batas kontra krimen. Dapat lang na may katapat.

**********

Di pa man umaabot sa plenaryo ng Bicameral Committee ang usapin bago lagdaan ng pangulo upang maging batas, katakot-takot na mga tanong at batikos. Ang pinakamatinding tanong ay kung bakit daw hindi kasama ang plunder at rape sa pinagkaisahang Death Penalty re-imposition? Bakit ang mga drug-related crime lang ang papatawan ng parusang kamatayan? Sa anong estado ng pagkakasangkot sa droga ang mga kasama sa mapaparusahan? Pati ba mga user-pushers na pawang mga biktima rin ng mga drug lords o suppliers? May nagtanong pa kung kasama ba riyan ang mga tao ng gobyerno na naging bulag at kasabwat din ng drug lords? Kasama rin ba riyan ang mga opisyal na maituturong protector ng droga, maliit man o malaking isda ang hawak? Hindi kaya sinadyang hindi maisama ang plunder sa death penalty dahil maraming opisyal ng gobyerno ang mabibitay? Papaano na ang mga biktima ng rape at pagpatay? Hayy naku, marami pang katanungan ang dapat masagot bago maisabatas ang bill na yan, sabi ng marami. Sige mga kabayan, hintayin na lang natin ang kahahantungan ng isyung ito. Abangan ang susunod na kontrobersiya. Adios mi amor, chiao, mabalos!

Amianan Balita Ngayon