DILG, PDEA DINAYAWDA DAGITI LGU TI REGION 1, AHENSIA PARA DAGITI INISIATIBA PARA KAPIA, KONTRA-DROGA

November 23, 2024 Headlines

SAN FERNANDO CITY, La Union

Sangsangkamaysa a binigbig ti Department of the Interior and Local Government (DILG) ken ti Philippine Drug
Enforcement Agency (PDEA) iti Ilocos Region dagiti naisangsangayan a panagregget dagiti local government units (LGUs), national agencies, ken civil society organizations iti panangidur-as ti peace and anti-drug initiatives kabayatan ti awarding ceremony a naangay idi Lunes iti daytoy siudad. Intampok ni DILG Secretary Juanito Victor
Remulla, inrepresentar ni Director IV Debie Torres ti Bureau of Local Government Supervision, dagiti nagapuanan
ti rehion iti panangitandudo ti kappia ken panangparmek kadagiti maiparit a droga.

“Ti kolektibo a panagreggetyo ti pundasion dagiti nataltalged ken nataltalna a komunidad. Saankayo laeng a
pagwadan no di ket adigi pay ti nasayaat a panagturay,” kinuna ni Torres. Ti seremonia ket nangrambak iti 126 nga high performing Peace and Order Councils, a nakagun-od iti naisangsangayan a 97.67 a porsiento a functionality rate. Impaganetget ni Torres ti kinapateg ti panagtitinnulong, kinunana, “Dagiti pasamak a rambakantayo ita ket
pammaneknek a no agtitinnulongtayo, maragpattayo ti awanan droga ken natalged a Filipinas.”

Iti kampania kontra droga, na-clear ti Region 1 ti 2,710 a barangay ken naideklara ti 338 a barangay a naan-anay nga
awanan iti droga agingga idi Setiembre 2024. Agdagup iti 123 nga high performing Anti-Drug Abuse Councils met ti nabigbig gapu iti kritikal nga akemda iti pananglapped iti panagadu ti illegal a droga ken panangtaginayon iti kinatalged ti komunidad. Dinayaw ni PDEA Ilocos Regional Director Joel Plaza ti panagtitinnulong dagiti nadumaduma nga ahensia para iti pannakapapigsa ti pannakidangadang kontra iti illegal a droga.

“Ti pannakitinnulong kadagiti ahensia ti tulbek tapno mapapigsa ti pannakadanon dagiti programatayo. Sangsangkamaysa, siguraduenmi a dagiti komunidadtayo ket naammuan, makipaset, ken naikkan iti pannakabalin a mangtaming a sieepektibo iti peggad ti droga,” kinunana. Inulitna pay ti kinapateg ti kolektibo a pagrebbengan iti
agtultuloy a laban kontra droga, nga indagadagna kadagiti amin a maseknan nga agtalinaed a nakumikom ken agkaykaysa iti pannakidangadang para iti nataltalged a Pilipinas.

Nagleppas ti nasao nga aktibidad babaen ti napigsa nga awag iti agtultuloy a panagtitinnulong, baro a pamayan, ken dedikasion dagiti stakeholders tapno masigurado ti nataltalged, drug-free, ken progresibo a Region 1. “Agtitinnulongtayo a mangbangon iti masakbayan a sadiay ti tunggal Filipino ket nawaya manipud kadagiti pangta
nga itden ti illegal droga,” inngudo ni Direktor Plaza.

(AIHR, PIA Region 1/PMCJr.- ABN)